Assi: Camilla Dam/KNR

Takornariaqarnermik suliaqartut: Takornariat amerlippat sullissinerput pitsaanerulissaaq

Takornariat Nunatsinnut tikittartut amerliartortittuassagutsigit, taakkuninnga kiffartuussinerput pitsaanerulertariaqarpoq. Nunatsinni takornariaqarnermik suliaqartut taama isumaqarput oqarlutik, kiffartuussinerup pitsanngornerani soorunami takornariarusuttut amerliartussasut.

- Takornariat amerlanerit tikittalerpata taakkuninnga sullissinerput pitsaanerulissaaq ukiorlu naallugu. suliffigineqarsinnaalissalluni.

Nunatsinni takornariaqarneq pillugu siunnersuisoqatigiinni, Visit Greenlandimi pisortaq, Anders Stenbakken oqarpoq.

Takornariaqarnerli pillugu suliffeqarfiit sullissilluarneri nersualaarneqartariaqartoq, Anders Stenbakkenip ilanngullugu oqaatigaa.

Takornariat amerliartuinnartut Nunatsinnut tikittalernerat ilutigalugu, taakkuninnga kiffartuussinerput pitsaaneruleriartorumaartoq, Nuummi takornarialerinermik suliaqartup, Tupilak Travelip pisortaa, Henrik Skydsbjerg KNR-imut aamma oqarpoq.

- Siunertaq pingaaruteqarnerpaaq tasaavoq, Nunatsinni takornariaqarneq eqqarsaatigalugu tamassuminnga siuarsaanissaq takornariallu periarfissagissaartinneqarnerunissaat, ilaatigut angallassisarnerit amerlineqarnerisigut annertusinerisigullu, Henrik Skydsbjerg oqarpoq.

 

Takornarissat tikittartut amerliartorput.

Nunatsinnut takornariat timmisartunut ilaallutik tikittut, ukioq manna aprilimiit juuni ilanngullugu 19.235-upput. Taakku siornamut naleqqiullugit 1800-nik amerlanerullutik.

Taakkulu eqqarsaatigalugit, mittarfinni takornarissanik tikilluaqqusisinnaasunik, ullup ilaannaani sulisinnaasumik, atorfinitsitsisoqarsinnaanera, Henrik Skydsbjergip siunnersuutigaa.

-  Nunanit allanit mittarfinnut tikittartut eqqarsaatigalugit, ullormut akunnerit arlaqanngitsuni sulisinnaasumik atorfinitsitsisoqarpat, taassuma isumagisassavai illoqarfinni suut takuniarneqarsinnaanersut, illoqarfiup assiliorneqarneranik tunniussisarluni allanillu pisariaqartinneqartunik ikiuulluni, Henrik Skydsbjerg oqarpoq.

 

Umiarsuit takornariartaatit aamma amerlanerit tikittalerput

Umiarsuit takornariartaatit Nunatsinnut ukioq manna tikittut amerleriarsimapputtaaq. Umiarsuit siorna tikittut 275-iusut ukioq manna amerlanerupput tassa 295-it umiarsualivinnut tulammata.

Umiarsuarnulli ilaasut qasserpiaanersut Visit Greenlandimit maannakkorpiaq oqaatigineqarsinnaanngitsoq, pisortap Anders Stenbakkenip oqaatigaa, umiarsuilli angisoorsuit amerlanerit ukioq manna tikissimasut oqarluni.

Aamma taakku pitsaanerusumik sullinneqarnissaat Anders Stenbakkenip pingaaruteqarnerarpaa.

- Nunat allamiusut oqaatsit sullissinerillu eqqarsaatigalugit taakku pitsaasumik aallunneqarput. Eqqaamaneqartariaqartorli tassaavoq, Nunatsinni takornariaqarneq kisimi suliffeqarfiunngimmat aamma takornarianik sullissisinnaasut ikittuararsuuneri eqqaamaneqassaaq.

Nunatsinni takornariaqarneq pillugu siunnersuisoqatigiinni, Visit Greenlandimi pisortaq, Anders Stenbakken oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat