Takornariaqarnermik siunnersorti: Takornariat aningaasaateqarnerusut aallunneqarnerunissaat isumaqatigaara
Takornariat aningaasaateqarluartut Nunatsinnukartarnissaat aallunneqarneruppat, Nunatta aningaasarsiorniarneranut tamanna iluaqutaanerussasoq, Visit Greenlandimit ilaatigut oqaatigineqarpoq, Qaasuitsullu Kommuniani takornariaqarnermut siunnersorti Konrad Seblon matumani isumaqataavoq. Periarfissalli suut aallunniarneritik, takornariaqartitsisut namminneq aalajangertassavaat ineriartortillugillu, Konrad Seblon ilaatigut oqarpoq:
- Pisoorsuit tikittartut nerinerunatillu pisineruneq ajorput. Iluliarsuit ataasiaannaq alakkartarpaat, hoteliminnilu ataasaannaq unnukkorsiortarlutik, naak aningaasaatilissuugaluarlutik, aningaasaatikinnerugaluarlutilluunniit, Qaasuitsup Kommuniani takornariaqarnermut siunnersorti Konrad Seblon oqarpoq.
Nunatsinni takornariat pillugit sullissinermi 2015-i naatinnagu angusassat, Visit Greenlandip Naalakkersuisut peqatigalugit saqqummiuteqqammerpai:
- Takornariat nutaat pillugit paasissutissat suunersut paaserusuppavut. Periarfissat suut ujartortarneraat paaserusullutigit, takornarianut periarfissat taamaasilluta ineriartortissinnaaniassagatsigit, Visit Greenlandip pisortaa Anders Stenbakken Radioavisiimut ilaatigut oqarpoq.
Tassalu paasissutissat ineriartortitsinissamut atorneqassapput, takornarianulli paasissutissiinissamut aamma atorneqassallutik, Visit Greenlandip pisortaata tullia Anders la Cour Vahl, oqarpoq. Takornariammi Nunatsinnukarniarnerminni pilersaarusiornerminnilu paasissutissat sukumiisut pissarsiarisinnaagunikkit, Nunatsinnut tikilluaqqusaasutut misigisimassapput, tamannalu pingaaruteqarpoq, Ander la Cour Vahl oqarpoq:
- Takornariat ujartugaat ilisimagaanni, periarfissat pissusissamisoornerusumik ineriartortinneqarsinnaapput. Tassa paasissutissat tutsuiginartut pigigaanni takornariat nangaassuteqaratik Nunatsinnikarsinnaassapput, tamannalu pingaaruteqarpoq, Anders la Cour Vahl oqarpoq.
Takornariat 450-it Sarah Woodallip Visit Greenlandimeersup sinerissami siorna ukioq mannalu isumasiorsimavai. Nunarput tamakkingajallugu taanna angalasimalluni, soorlu aamma Sarfaq Ittummut ilaalluni sapaatip-akunnera ataaseq angalasimasoq, takornariarpassuillu tassani naapissimallugit.
Anders la Cour Vahl inunnik kujataani isumasiuisuusimavoq.
Takornarialli tassa Nunatsinnukarnerusalernissaat anguniaraanni nittarsaassilluarnissaq allaqqunneqarsinnaanngitsoq, Konrad Seblonip oqaatigaa:
- Nittarsaassineq pingaarutilerujussuuvoq. Imatut inissisimasariaqarpugut alloriarnermik ataatsimik siulliulluta. Umiarsuit takornariartaassuit eqqarsaatigissagutsigit siornaakkunni alloriarnernik arlalinnik kinguussaaqqanikuuvugut umiarsuit 3000-inik ilaasullit tikittaleraluarmata, kisianni taakku uneqqipput, umiarsuillu minnerit maanna tikittarlutik. Nittarsaassinikkut taakku immaqa sullinneqarluarsinnaasimagaluarput, tikittarnerallu ataavaannarluni, Konrad Seblon, Qaasuitsup Kommuniani takornariaqarnermut siunnersorti, oqarpoq.
Kisitsisit Kalaallit Nunaanni Naatsorsueqqissaartarfimmeersut takutippaat takornariat Nunatsinni unnuisarneri 2011-mut naleqqiullugu siorna 1,5 procentinik ikileriarsimasut.
