Takornariaqarnermik ingerlatsisut amerliallattut
Issittumi takornarianik angallassisartunngortut qulit pingaaruteqangaatsiarput. Ilinniakkamimmi aallartitsisimasunit ikittuinnaat qaammatini tallimani ilinniagaq naammassinnissimavaat. Ilinniakkami tassani aallartittut 32-usimapput taakkuali pingasoraarterutaannaat ilinniakkaminnut ataasinngormat allagartartaarput.
- Tassa sakkortugami, atugassat oqimaatsut atuartassavagut paasillugillu paasilluariarlugillu saqqummiussinnaanngortariaqarlugit.
Issittumi takornarialerisunngorlaaq, Qasigiannguaneersoq Steve Sandgreen, oqarpoq. Taannalu ilinniartitsisuminit Niviatsiaq Guldagerimit taperserneqarpoq.
Taassuma erseqqissaatigaa takornarialerisunngorniaraanni tuluttoorsinnaaneq pingaaruteqartoq aammali ilinniakkami taama sivikitsugisumi allanik piumasaqaatitaqartoq oqaatigalugu.
- Ilinniagassaqartarami amerlasoorujussuarnik taavalu atuarneq una sivikitsuarakasiulluni, tassami immaqa arlaatigut malinnaanngikkaangamik qimataalerlutik aallartittaramik, Niviatsiaq Guldager oqarpoq.
AAMMA ATUARUK Issittumi takornarianik angallassisartunngorniat aatsaat taama amerlatigisut
Suliffissaqassasut
Takornarialerisunngorlaalli ilinniakkaminnik naammassinnikkunik suliffissaaleqinavianngillat.
- Tassa amerlanerit naammassigaangamik suliffittaarsinnaasarput, aamma amigaatigineqartaqigamik kalaallit guidet, Niviatsiaq Guldager oqarpoq.
Steve Sandgreenilu aamma suliffissaaleqinavianngilaq.
- Tassa sulilissamaarpunga Nuuk Water Taximi, tassanngaanniit taava takornarissat sullittassavakka, Steve Sandgreen oqarpoq.
Takornarialerisullu suli amigaatigineqarmata Steve Sandgreenip takornarialerisunngorniarusuttut kaammattuuteqarfigai.
- Oqaatsinik pikkorissarnissaat pisariaqarpoq. Tuluttut oqalulluarsinnaanissaq qallunaatullu. Taavalu takornarianut saqqumiussilluarsinnaaneq, taamaasilluni pitsaanerussammat. Taavalu sapiissuseqarnissaq. Aamma ilinniagaq una innersuukkusunnaqaaq sivikikkaluarluni pissarsinaqigami.
Campus Kujallermi Issittumi takornarialerisunngorniarfik 2012-imi pilersinneqarmalli maannamut 72-it ilinniakkamik naammassinnissimapput.
AAMMA ATUARUK Campus Kujallermi ilinniarfik nutaaq
