Takornariaqarnermi toqqissiviilliorneq Atassutip apeqquserpaa

Nunatsinni Takornariaqarnemi Inuussutissarsiornermilu Siunnersoqatigiit sulerinerat pillugu Atassutip naalakkersuisut nassuiaateqaqquvai. Atassut Inatsisartut suleriaasianni paragraf 36 naapertorlugu Naalakkersuisunut apeqquteqaateqarpoq.

Nunatsinni Takornariaqarnermut Inuussutissarsiornermullu Siunnersoqatigiinni paatsiveerusimaartoqarnera apeqquteqarnermut tunngaviuvoq.

Siunnersuisoqatigiinni pisortaq Stig Rømer Winther sapaatip akunnerani kingullermi tunuarpoq, ullorlu taanna siulersuisuni ilaasortaq Flemming Nicolaisen aamma tunuarluni. Siunissami siunnersoqatigiit suleriaasissaannut akerliuneq tunuarnernut tunngaviuvoq.

Atassutikkut isumaqarput takornariaqarnerup inuussutissarsiornerullu kalaallinut iluaqutaasumik ineriartortinneqarnissaa pingaartuusoq taamaattumillu Siunnersuisoqatigiinni pisoq toqqissisimananngitsuusoq.

- Siunnersoqatigiinni toqqissiviilliorneq pissutigalugu suliumajunnaartoqarsinnaanera aarleqqutigaarput, Inatsisartunut ilaasortaq, Inatsisartullu Inuussutissarsiornermut Ataatsimiititaliaanni ilaasortaq Atassummeersoq Thomas Kristensen oqarpoq.

Nunatsinni Takornariaqarnermut Inuussutissarsiornermullu Siunnersuisoqatigiinnit pisut pillugit Atassut arfinilinnik Naalakkersuisunut apeqquteqarpoq.