Takornariaqarnermi periutsit GTE-mit attatiinnarneqarput
Takornariat Kalaallit Nunaannukartut ikiliartornerat pissutaalluni angalatitsinermik inuussutissarsiuteqartut tamarmik aningaasarsiornikkut ajornartorsiuteqartut taassuma oqaatigaa.
- Kalaallit Nunaalli sumunnarfinnut allanut sanilliutissagaani Kalaallit Nunaat sakkortunerpaamik eqqorneqartut akornaniinngilaq. Nunarsuarmi sumunnarfiit soorlu Spaniap, Grækenlandip Tyrkiallu tikeraat ikileriarnerat annertunerujussuarmik malugaat, allaat 50 procentit angullugit ikileriarsimallutik, GTE-p pisortaa allappoq.
Takornariat Nunatsinnukartartut ukiuni arlalinni ukiumut 10 procentimik amerliariartarsimanerat tikkuarlugu, ukiumi ataatsimi marlunniluunniit ikiliartorneratigut pitsaasumik ineriartorneq, ilaatigut silap pissusaata allanngoriartornera pissutaalluni allanngortinneqanngitsoq taassuma aamma oqaatigaa.
- Pingaaruteqarpoq takornariaqarnerup iluani Kalaallit Nunaata tunisassianik nutaanik ineriartortitsiuarnissaa, taamaasilluni suli pilerinartuussalluni Kalaallit Nunaata misigisaqarfiginissaa qimussinik, angallatinik, bussinik, qulimiguulinnik allanillu, Thomas Rosenkrands Sermitsiamut oqarpoq.
Kalaallit Nunaat Vestnorden Travel Martimik ukiaru aaqqissuisuussaaq, GTE suleqatigalugu Københavnimi nittarsaassisoqassammat.
Tamatumani GTE ataatsimeersuarnissamik suliniteqarpoq, silap pissusaata allanngoriartornerata kinguneqaatai piffinnilu ajornartorsiorfiusuni nutarterinissap pingaaruteqassusia, takornariaqarnermik ingerlatsisut namminneq tunisassianik nutaanik isumassarsiornissaannut ikiorumallugit.
