Takornariaqarneq pillugu Maniitsumi isumasioqatigiinnersuaq
Nunat avannarliit killiit takornariaqarneq pillugu Maniitsumi isumasioqatigiinnerat nunani avannarlerni, soorlu Norgemi Sverigemilu qinikkanit ministerinillu peqataaffigineqartoq ullumi aallartissaaq, juunip qulingiluata tungaanut ingerlanneqassalluni.
Nunani avannarlerni killerni siunissami takornariat suna piumasarissavaat? Suullu neqeroorutigineqartassappat? Apeqqutit tamakkuupput isumasioqatigiittut isummersorfigisassaat.
Nunat avannarliit killiit siunnersuisoqatigiiffiata siulittaasua Henrik Old oqarpoq nunat avannarliit takornariaqarnikkut suleqatigiinnerat siunissamilu suleqatigiinnissat aamma eqqartorneqassasut.
Nunani avannarlerni timmisartukkut aqqutit immikkullu aaqqissuussanik takornariartitsisarnerit aamma oqaluuserineqassapput.
Isumasioqatigiinnermi saqqummiissapput nunatsinni Savalimmiunilu takornariaqarnermut naalakkersuisut, aamma Islandip avatangiisinut ministeria, Danmarkimi siunissaq pillugu ilisimatusarfik, nunat avannarliit siunnersuisoqatigiiffianni siulittaasoq Ole Stavad, Air Iceland, takornariartitsivik Topas, Norgemi Sverigemi naalakkersuisut nunallu avannarliit killiit takornariaqarnermut siunnersuisoqatigiiffiat.
