Assi: Camilla Hey - Visit Greenland

Takornariaqarneq pillugu ilinniagaq qaffasinnerusoq

Takornariaqarneq pitsanngorsarniarlugu nunatsinni ilinniagaqarneq qaffassartariaqarpoq. Tamanna Inuussutissarsiornermut Naalakkersuisoqarfiup takornariaqarneq pillugu periusissiaani nutaami ilaatigut allaqqavoq. Visit Greenlandimilu pisortap, Anders Stenbakkenip, takornariaqarneq pillugu qaffasinnerusumik ilinniarfimmik nutaamik pilersitsinissaq kissaatigaa.

Ullumikkut issittumi takornarianik angallassisartunngorniartoqarsinnaavoq takornarialerinerlu immikkut sammisaralugu serviceøkonomitut Niuernermik Ilinniarfimmi ilinniartoqarsinnaalluni. Visit Greenlandimili pisortaq Anders Stenbakken takornariaqarneq pillugu pilersaarusiornermut tunnganerusumuk qaffasinnerusumik ilinniakkamik takorluugaqarpoq.

- Nunatsinni takornariaqarneq pillugu pilersaarusiorsinnaanermut ingerlatsisinnaanermullu qaffasinnerusumik ilinniakkamik amigaateqartoq isumaqarpugut, Anders Stenbakken oqarpoq. 

Ilinniakkamik nutaamik pilersitsineq inuiaqatigiinni sapiissusermik piumassusermillu takutitsissasoq taanna isumaqarpoq. 

- Imaanngilaq ilinniakkap aappaa aappaaniit ajunnginnerummat. Issittumi takornarianik angallassisartut serviceøkonomillu ulluinnarnik suliassanik suliaqartuupput, uanilu oqaatsit tungaatigut piginnaaneqarneq pingaarluinnassaaq. Inuussutissarsiut takornariartitsinertut ittoq ineriartortillugu ilinniakkamik nutaamik pilersitsineq iluaqutaassaaq. Tassuuna aamma angusaqarluarniarnerput takutissavarput. Ineriartornerup aamma nammineerluta aqussinnaanissaa qulakkiissavarput, Anders Stenbakken oqarpoq 

Qaffasinnerusumik ilinniagaqalertussat qanoq sunillu niuertoqassanersoq, takornariaqarnermilu atugassaritinneqartut pitsaasuunissaat, taavalu aamma nunami tamakkerlugu nunallu immikkooortuisa suleqatigiinnissaat qulakkiissagaa, taanna isumaqarpoq.

 -Takornariaqarneq akisussaassuseqartumik attanneqarsinnaasumillu ineriartortissagipput pingaartuusoq tunngaviusumik isumaqarpunga. Nunatsinni piginnaasagut ineriartortinniassagatsigit nunatsinneersunik ilinniartitsinissarput aamma pingaartuuvoq, Anders Stenbakken oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl