Takornariaqarneq iluaqutaasariaqarpoq killormuunngitsoq
John S. Hull takornariaqarnermi immikkut ilisimasalittut nunarsuatsinni ataqqisaavoq pingaartumillu issittumi takornariaqarneq qissimingaarsimasaasa ilagaat.
Umiarsuarnik takornariartaatinut ilaallutik takornariat 30.000-ngajaat siorna nunatsinnut tikipput iluliarsuillu saneqquallugit killingusaaqarfiillu kingullersaata takunissaa ukiuni aggersuni suli pilerinartinneqarnerujartortussaavoq.
- Taamaattumik qulakkeerneqartariaqarpoq takornariaqarneq innuttaasunut iluaqutaassasoq innuttaasut atugaasat pitsanngoriartornerannut ilapittuutaassalluni. Aamma pingaarluinnarpoq inuusaatsip illersorneqarnissaa tammariartortinnagu piniariarsinnaaneq siunissami atuuttussatut qulakkeerneqassappat, taama KNR-imut oqarpoq John S. Hull.
Silaannaap allanngornerata nassataanik aamma umiarsuit issittumi angallattut amerliartorput taamaattumik avatangiisit illersorneqarnissaat pingaarluinnarpoq.
- Silaannaap allanngornerata inuuffigisavut allanngortippai. Taamaattumik aamma ilimaqqissaartariaqarparput umiarsuarnik takornariartaatit inuusaatsip suli allanngornerunissaanik nassataqassanersut, taama John S. Hull oqarpoq.
Taanna isumaqarpoq misigisassarsiorluni takornariartitsisarneq piukkunnarluartuusoq tassani takornariariaatsimi peqataasut ikinnerusarmata inuiaqatigiinnulli aningaasat atugaat amerlanerusarlutik. Tamanna nunatsinni takornariaqarnerup inerisarnissaani siunnerfiit ilagisariaqaraat isumaqarluni.
John S. Hull ulluni makkunani Nuummiippoq umiarsuit atorlugit takornariartitsisarneq pillugu GTEp isumasioqatigiisitsinerani peqataalluni.
