Takornariaq ujarneqartoq
Nutaanik ilaartugaq
Qeqqani politiit takornariamik Arctic Circle Trailikkut Sisimiunit Kangerlussuarmut angalanermini maqaasineqartutut nalunaarutigineqarsimasumik ujaasinertik unitsikkallarpaat
Maqaasineqartoq suliartorsimanngimmat attaveqartarsimanngimmallu ilaqutaasut ernumanerat pissutigalugu Sermersuumi Politiit City of London Policemit juulip ulluisa 20-anni attavigineqarsimapput.
Ujarneqartup Yat Wui Cheungip Hong Kongiminngaanneersup, Tuluit Nunaannullu isersinnaanermut allagartaqartup Kangerlussuarmit Københavnimukarnissaminut juulip ulluisa 18-ianni billetseqaraluarpoq.
Yat Wui Cheung 27-inik ukiulik isaruaqarsinnaavoq, kavaajamik sungaartumik atugaqarsinnaalluni, sungaartoq aappaluaartumik nammattagaqarsinnaavoq nassataqarpallaarnanilu.
Maqaasineqartoq Arctic Circle Trailikkoortilluni Eqalugaarniarfimmi illuaqqami julip ulluisa 14-ianni kingullermik takuneqarpoq.
Politiit Sisimiut Kangerlussuullu akornanni Air Greenlandip qulimiguuliutaa atorlugu ujaasigaluarput.
- Kisianni sumiissinnaaneranik suli ilisimasaqanngilagut. Illuararlu qimammaguli suli takuneqaqqinngilaq, nakkutilliisoq KNR-imut oqarpoq.
Politiit ujaasinertik nangissaneraat, suliamilu qanoq alloriartoqaqqissanersoq ataasinngornermi juulip ulluisa 25-ianni aalajangerneqassaaq.
Takornariamut maqaasineqartumut paasissutissaatillit Sisimiut politiivinut politiinulluunniit qaninnernut saaffiginneqquneqarput. Sisimiuni politiit oqarasuaataasa normoraat 701322.
