Takornariaq amerikamiu Kangerlussuarmi qiulluni ajunaarpoq

Takornariaq amerikamiu 42-nik ukiulik, Kangerlussuarmi najugaqarfimmiit 300 meeterinik ungasitsigisumi toqungasoq, sapaatiummat ullaakkut nassaarineqarpoq.
novembarip 09-at 2009 08:07

Angut nasaarineqarnermi nalaani nalunaaquttap akunneri arlallit apummi nalasimavoq, sunalu toqqutigisimaneraa politiit suli oqaatigisinnaanngikkallarpaat.

- Angutip Kangerlussuarmiinneranut suna peqqutaanersoq massakkut suli ilisimaneqanngilaq, aamma toquneranut atatillugu arlaannik saaffiginnittoqanngilaq, Kangerlussuarmi politiit ittuat Lars Grunnet oqarpoq.

Angut 42-nik ukiulik sapaammi ullaassakkut sisamat missaanni kingullermik takuneqarpoq. Taamaalineranilu sila 16-inik issippoq.

- Angut nassaarineqarnermi nalaani oqortunik atisaqarsimavoq, taamaattumik iluaallersimanissaa ilimagineqarpoq, Lars Grunnet oqarpoq.

Angutip 42-nik ukiullip timaa USA-mut angelaanneqarnissami tungaanut Kangerlussuarmi toqusut inaanniitinneqarpoq. Aamma amerikamiut Danmarkimi aallartiqarfiat aqqutigalugu angutip ilaqutai pisumik ilisimatinneqareerput.

Angut 42-nik ukiulik Kangerlussuarmut tallimanngormat tikippoq, Danmarkimullu ullumi ingerlaqqittussaagaluarluni, Kangerlussuarmiinneranullu suna peqqutaanersoq politiinit ilisimaneqanngilaq.