Takornarianut nutaamik ussassaariniat

Narsami inuussutissat pillugit sapaatip-akunnerata naanerani isumasioqatigiittoqarnerani piginneqatigiilluni ussassaaraluni tuniniaaviliortoqalersaarpoq.

Suliniummut suleqataasoq Sisimiuni inuussutissarsiutit pillugit siunnersuisoqatigiinneersoq Frank Ruben Nielsen oqarpoq, nunanut allanut sammisumik ussassaareriaaseqarniarlutik.

- Piginneqatigiilluta ussassaarisalernissamik suliniuteqarpugut, nunarsuarmioqatitta Kalaallit Nunaannut kajungilissutigisinnaasaannik.

- Nunatsinniittut suliffeqarfeeqqat ilaat tunisaqarniaraluartillutik tunisaqarluarnissaminnik ajornartoortarput. Taamaammallu suliffeqarfiit kattullutik maanna suliniuteqarnialerput, Frank Ruben Nielsen oqarpoq.

Taanna nangilluni nassuiaavoq, suliffeqarfiit peqatigiinnermikkut tunisassiamik tunineqartarnissaat isumagisassarissagaat.

Isumasioqatigiinnermi ilaatigut taakkartorneqarsimavoq, Paamiut pujoorivianni avannaata ammassaanik pujoorisoqartalissasoq, aammalu Neqi A/S Narsamiittoq ukioq ataaseq qaangiuppat savat, tuttut umimmaallu neqaannik pølse-liortalissasoq. Aammattaaq sukkuaqqat nunatta naasuinik akuukkat kusanartumillu poortukkat pisiariumaneqarluarnerat erseqqissaatigineqarportaaq.

Aammalu siunnersuutit ilagaat, nerisassanik ussassaarinermi Air Greenland ilaatinneqassasoq, ilaatigut takornariat timmisartumi ilaasut kalaalersunnitsunik ussiisinneqartalissallutik.

- Tunisassiarineqartut Kalaallit Nunaaniugaluarpat nunaniluunniit allaniikkaluarpat akisunaarlugit tuniniarneqassapput tunisassiortumut iluanaarutaasinnaanngorlugit, Frank Ruben Nielsen oqarpoq.

Taanna erseqqissaavoq akisussaaffissat agguaanneqareersut, niueriaasissarlu pilersaarusiorluariarlugu angalatitsiviit takornariartitsiviillu oqaloqatiginiaritsik. Taamalu neriuutigaa suliaq ukiamut iluamik aallartilluarumaartoq.