Takornarianut najoqqutassiaq japanimiusoortoq saqqummersinneqarpoq

Japanimiut takornariaqartitsisartut takornariallu Kalaallit Nunaat pillugu maanna najoqqutassaqalerput, Anders la Cour Vahl, GTE-mi suliniutinut attaveqaqatigiinnermullu pisortaq, oqarpoq:

- Kalaallit Nunaat pillugu takornariaqartitsisunut takornarianullu japanimiusut allatanik siornatigut peqarnikuunngilaq, tamannali maanna allanngorpoq, Japanimiullu namminneq oqaatsitik atorlugit Kalaallit Nunaat pillugu maanna atuagassaqalerput. Japanimiut takornariaqartitsisartut marluk atuakkiortuupput, Anders la Cour Vahl oqarpoq.

Takornariaqartitsineq aningaasatigut isertitsissutaasarpoq, japanimiullu 500-t ukiuunerani Nunatsinnukartalernissaat anguniagaavoq.

Japanimiut 7000-it ukiuunerani siorna Islandimiipput, tamaaniinnerallu iluatsillugu Kalaallit Nunaannukartarnissaat suliniutigineqarniarpoq.

Takornariat Japanimeersut akissaqarluartarput, amerlanerillu utoqqasaajunerusarlutik, taamaammat sukkulluunniit angalasinnaasarput soqutiginaqalutillu.

Japanimiut marluk ukiup massuma ingerlanerani Nunatsinniipput. Japanimiut nerisannaavat tassaavoq nerisassiaq sushi, aalisakkanit pisoq. Taamaakkaluartoq Kalaallit Nunaata aalisagaqarluarnera najoqqutassami allaaserineqanngilaq, Anders la Cour Vahl oqarpoq:

- Takornariat Nunatsinnukartut periarfissanik ulikkaarput. Kulturikkut immikkuullarissuunerput misigisaqarfigisinnaavaat. Qimussersinnaapput, nerisassiavut ooqattaarsinnaavaat, allarpassuarnillu misigisaqarsinnaallutik. Akitigummi unammillersinnaanngoreerpugut, GTE-mi suliniutinut attaveqaqatigiinnermullu pisortaq Anders la Cour Vahl oqarpoq.

Spaniamiusut, franskisut italiamiusullu aamma atuakkiortoqarsinnaanissaa, Nunatsinni Takornariaqarnermi Inuussutissarsiornermilu Siunnersuisoqatigiit eqqarsaatersuutigaat.