Takornarianut akitsuuusiisoqaraluarpat Ilulissanut takornariat ikilinavianngillat
Danskit 2010-mi nalunaarusiaanni tamanna aamma kaammattuutigineqarsimavoq, nalunaarusiarlu taanna naapertorlugu takornariartoqanngitsoorneranik kinguneqarnavianngilaq. Paarlattuanik nalunaarusiami oqaatigineqarpoq takornariat sumiiffimmut iserternissaminnut akiliuteqarusuttartut.
-Takornariamut 10 kr.-inik akitsuusiinissap anusinngortitsinissaa takorloorsinnaanngilara. Taamatut aaqqissuussineq nunarsuarmi sumiiffinni allani iluatsilluartumik atorneqarpoq, aamma takornariat Kalaallit Nunaannukarnissaminnut aningaasarpassuit atoreertarpaat, sapaatit akunneranilu unniuinissamut 70 kr.-inik akiliinissaq Ilulissanukanngitsuuinnarnermik kinguneqarnavianngilaq, UNESCO site manager Naja Habermann knr.gl-imut oqarpoq.
Ilulissat kangerluata UNESCO-p allattorsimaffimmiinnera nunatta 63,5 mio. kr.-inik isertitsissutigisaraluaraa najukkami politikerit ilaasa nunarsuarmi eriagisassanngortitsisimaneq isumaqatiginngilaat. Isorinnittut isumaqarput nunaminertami eriagisassami akunnittarfiliortoqaqqusaannginnera allanillu sanaartortoqaqqusaannginnera illoqarfiup ineriartortinneqarneranut akornutaasoq. Tamannali ilulissat kangerluata allaffeqarfianit isumaqataaffigineqarpallaanngilaq.
-Taamatut uagut isiginngilarput. Illoqarfik allamut alliartortissinnaavarput Ilulissat kangerluata tungaanoortinngikkaluarlugu, aamma Ilulissat kangerluat illoqarfiup nunap immikkoortuanullu takornariaqarnikkut siuttuujuaassaaq. Takornarianut unnuinerannik akitsuusiinikkut isertinneqartut kommunip sumiiffimmut eriagisassamut aningaasartuutaanik annikillisitsingaatsiassaaq, tamannalu tamanut iluaqutaassaaq. Eriagisassap illersuutigalugu ineriartortinneratigut kommunip nunattalu sumiiffimmik aningaasarsiutigisaqarsinnaanera qulakkeersinnaavarput. Sumiiffik eriagisassaq pinngortitamik pisuussutaavoq nunguttussaanngitsoq, Naja Habermann oqaluttuarpoq.
