Takornarianik qimussiussisartut peqatigiiffiliornialerput

Ilulissani qimussertartut peqatigiiffiat nutaaq aallartisarniarneqalerpoq, taamatut allapoq Takornariaqarnermut Inuussutissarsiornermullu Siunnersuisoqatigiit nutaarsiassassaqartitsivia allappoq.

Peqatigiiffik aallartisarniarneqartoq, takorniarianik qimussiussisartunik ilaasortaqartussaavoq.

Pilersaarusiornermi aqutsisoq Konrad Seblon takornariartitseqatigiiffimmi Distination Disko-meersoq oqarpoq, ukioq qimmit qimuttut tusagassiorfimmi sammineqarneranni tusaamanerlunneqarnerat pillugu takornarianik qimussiussartunik peqatigiiffiliorneq pilersinniarneqartoq.

Takornarianik qimussiussisartut peqatigiiffissat pilersinniarlugu ataatsimiittarnerit ikittuinnaat ingerlassimavagut, erniinnarli avammut tusarliunissaa naatsersuutigaarput, ukiamut qimussiussisarnerit aallartitsinnnagit piareersimaniassagatta, Konrad Seblon siunnersuisoqatigiit nutaarsiassaqartitsivianut oqarpoq.

Peqatigiiffiup aallartisarneqarnissaanut suliniuteqartuuvoq aalisartoq piniartoq takornarianillu qimussiussisartoq Johannes Mathæussen, Ilulissat.