Takornarianik angallassisartut qallunaat Ilulissani amerlanerupput
Takornariat nunanit assigiinngitsuneersut apeqqutigisarsimavaat sooq kalaallit takornarianik angallassisartut taama ikitsiginersut. Takornariartitsiviillumi kalaallinik sulisussarsiornertik aallunnerusinnaagaluarpaat takornariaqarnermik ineriartortitsinermut pisortaq.
Nunatsinni takornarianit ornigarneqarnerpaami ukiormannalu siuariarfioqqittumi avannaani qallunaat takornarianik angallassisartut kalaallinit amerlanerulluarput. Sulili ukiut arlallit ingerlajumaarput nunaqavissut takornarianik angallassisartuni amerlanerussuteqalernissaannut.
- Takornariat ataasiaratik aperisarpaatigut sooq pissutsit taamaannersut. Toqqaannartumik isornartorsiorneqarneq ajoraluarpugut, kisianni takornariat taamatut aperisarnerat eqqarsalersitsivoq, Destination Avannaani takornariaqarnermik ineriartortitsinermut pisortaq Konrad Seblon taama oqarpoq.
- Aamma uanga takornariat ilumoorneraannarsinnaavakka. Namminermi tupaallassimassaluarpunga Kina-mi qarmarsuarmi takornariartillunga svenskimik ilisimasortaqassaguma. Uppernartinnerussavara Kina-miumik ilisimasortaqassaguma, Konrad Seblon oqarpoq.
Takornariartitsiviilli arlallit maanna angallassisartunik kalaallinik sulisussarsiortalersimapput. Aamma takornariartitsiviit ilaasa pimoorullugu anguniartuarpaat atorfiit inuttassarsiorneqartut kalaallinik inuttalerneqarnissaat. Ilaqarpulli nunaqavissunik sulisussarsiornermi ilungersuuteqarnerusinnaagaluartunik, Destination Avannaa isumaqarpoq.
- Assersuutigalugu takornariartitsiviit aasaq sioqqullugu Aasianni ilinniarnertuunngorniarfimmukarlutik aasaanerani sulisussaminnik pissarsiorsinnaagaluarput, Konrad Seblon oqarpoq.
Destination Avannaa Qaasuitsup Kommunia aamma Qaqortumi Niuernermik Ilinniarfik suleqatigalugit angallassisartunik pikkorissaasimavoq.
- Kalaallit angallassisartut amerliartorusaarput. Aamma isumaqarpunga inuussutissarsiutitut taama pingaaruteqartigisumik inissisimatilluta pisussaaffittut isigisariaqaripput sapinngisamik nunaqavissunik sulisoqarnissaq, Konrad Seblon taama oqarpoq.
