Takornariamik ujaasineq unitsiinnarneqarpoq

Takornariamik russimik ujaasineq Tasiilami politiinit unitsiinnarneqartoq, Tasiilami politeqarfimmi pisortaagallartoq Jack Nathansen oqarpoq.
Allattoq Jaaku Lyberth
januaarip 06-at 2010 09:37

Tasiilami politiit Kulusummilu qatserisartut ullut kingulliit marluk qulimiguulimmik qamutinillu assakaasulinnik nunakkoorutineqarsinnaasut atorlugit Kulusuup qeqertaata annersaa avataalu ujaasiffigigaluarpaat, ujaarineqartorlu nassaarineqarani. Kulusuup nunataa quasattorujussuuvoq aputeqarpiaranilu. Kulusuup avataani sikkorlupput angallavigiuminaalluni. Takornariaq russeq, Islandimit ulluni pingasuni Kulusummiittussaalluni, Januarip ulluisa pingajuanni Kulusummut tikippoq, akunnittarfimmilu najugaqarluni. Tasiilami politiit ernummatigaat, russeq takornariaq, sikumut avalassimassasoq, nakkarlunilu.

Angut 30-t missaanni ukioqarpoq, ateqarlunilu Adel Borisov 185 centimeterinik angissuseqarluni, tuattuuvoq qaamasunillu nujaqarluni. Kingullermik takuneqarami kajortumik qaamasumik kavaajaqarpoq qernertumillu nammattagaqarluni.

Kulusummi innuttaasut angummik takunnissimasut politiinut saaffiginneqquneqarput oqarasuaat 98 14 48.

Maniitsumi politiit suli ujaaraat 50-inik ukiulik Siverth Petersen. Siverth Petersen imerniartarfimmi Aajomi januaarip ulluisa aappaanni kingullermik takuneqartoq 175 centimeterit missaannik angissuseqarpoq, pualananilu saluttuunngilaq, naatsunik qernertunik nujaqarpoq, kajortunillu iseqarluni.

Kingullermik takuneqarami qernertumik takisuumik kavaajaqarpoq koorpoqarlunilu.

Siverth Petersen politiit angallataanni Sisak II-mi igasuuvoq.

Siverth Petersenimik januaarip ulluisa aappaata kingorna takunnissimasinnaasut, sumiinneranilluunniit ilisimannittut, Maniitsumi Politiinut saaffiginneqquneqarput oqarasuaammut 81 32 22, imaluunniit 52 12 22-mut.