Takornarialerisut isumasioqatigiinnerat pissarsiffiulluartoq

Avannaani takornariaqarneq siuarsarniarlugu isumasioqatigiinneq Ilulissani Hotel Arctic-imi ingerlanneqartoq Destination Disko-millu aaqqissuunneqartoq, naammasseqammerpoq. Isumasioqatigiittut pingaarnertut aalajangiuppaat Ilulissani mittarfiup tallineqarnissaa, tamannalu naalakkersuisumit taperserneqartoq Maria Fleischer aaqqissuussisunut ilaasoq Destination Diskomillu suliniummi siunnersortaasoq oqarpoq.

-Takornarialerisut akornanni paasiniaqatigiinnermi pingaarnertut inernerivaa paasigatsigu suleqatigiiffiusinnaasut arlaqartut qaqilerneqaramik. Pingaarnertut Ilulissani mittarfiup 1799-mut tallineqarnissaa isumaqatigiissutigineqarmat, taannalu naalakkersuisumit Jørgen Wæver Johansen-imit aamma taperserneqarpoq. Tassunga atatillugu illoqarfinnut allanut Ilulissanuunnaanngitsoq takornariat siammarnissaat aqqutissiuunneqassasoq, soolu zoneprisikkut tamanna anguneqarsinnaalluni. Zoneprisi tassaalluni piffiit ataasiakkaat orninneqarsinnaanissaat aki ataaseq atorlugu, Marie Fleischer oqarpoq.

Isumasioqatigiinnermi takornarianik sullissisut piginnaasaasa qaffassarneqarnissaat aalajangiunneqarpoq, piginnaasat minnerpaaffilerneqassallutik. Ukiup ingerlanerani takornariaqarpiannginnerani angalanermi akinik aamma apparsaanissaq anguniarneqartunut ilaavoq, tassani Air Greenland ilaatigut aamma suleqataalluni.

Isumasioqatigiinnermilu peqataasut ineriartortitsinissaminnut piumassuseqartut Marie Fleischer-ip oqaatigaa:

-Takornariaqartitsilerisut piumassuseqartorujussuupput, assut ineriartortitserusupput, tamannalu assut malunnarpoq, Marie Fleischer oqarpoq.

Ilulissani, Qasigiannguani, Uummannami, Aasiannilu inuussutissarsiornermut ataatsimiititaliani ilaasortat, naalakkersuisunut inatsisartunullu ataatsimeersuarnermi nalunaarummut tapersiillutik allagaqarput.

Ataatsimeersuarnermi inuit 80-it sinneqartut peqataapput.