Takornarialerisarneq piniartunut iluaqutaassaaq

marsip 10-at 2005 14:19

Piniartutut allagartaqarneq pillugu inatsit allanngortinneqarpat, piniartunik ikiliartortoqarnera annikillisinneqarsinnaasoq oqaatigineqarpoq.

Piniarnermut allagartaq pigiinnassagaanni, piniartup aningaasatigut minnerpaamik isertitaasa affai piniakkaniit isertitaassasut, piniartutut allagartaqarnermi inatsimmi allaqqavoq. Allat aqqutigalugit piniartup aningaasanik isertitaqarsinnaanissaanut killiliisartoq, piniartutut inussutissarsiuteqarneq pillugu misissuisimasoq Rasmus Ole Rasmussen nalunaarusiamini allappoq.

Raatiuaviisip paasisai malillugit, piniartut allagartaata inatsisaani ilannguisoqarnissaa sulissutigineqarpoq, tassa piniarnermut tapertaralugu takornarianik angallassisarsinnaaneq aningaasarsiutigineqalersinniarneqalerpoq.

Sisimiuni piniartutut inuussutissarsiutilik Mathias Ingemann, oqarpoq piniarnermut allagaartap pigiinnarnissaanut inatsit allannngortinneqarpat piniartunut iluaqutaassasoq.

- ukiorpaalussuit inatsit taanna allanngortinniarlugu piniartuusugut saaffiginnittarsimavugut, taamatullu pisoqalernera qujanarpoq. Mathias Ingemann oqarpoq.

Piniartut killeqannginnerusumik takornarianik sullissisinnaalerpata aningaasanik isaatitsisinnaaneq piniartunut pitsanngussasoq, Sisimiuni piniartoq Mathias Ingemann oqarpoq.

- Minnerunngitsumik aningaasaqarniarnerup tungaatigut iluaqutaassaaq. Taamaattumik takornarialerineq aningaasarsiutitut tapertarineqarluarlernissaa qujanarpoq, piniartoq takornarianillu angallassisartoq Mathias Ingemann naggasiivoq.