Takorluukkersaarusiaq piviusunngulerpoq

Kalaallit sarsuatitaliaralugu takorluukkersaarusiaata siullersaat immiunneqalissaaq aggustip ulluisa sisamaanni, taama allappoq aviisi Sermitsiaq.

Filmiliorneq sapaatip akunnerinik sisamanik sivisussuseqartussaq Nuummi, Kapisilinni Kangerluarsunnguaq ingerlanneqassaaq.

Filmimi pingaarnertut inuttaasussat tamangajammik inuttalerneqareerput. Pingaarnertut inuttaassaaq isiginnaartitsisartoq 36-nik ukiulik Lars Rosing. Taassuma filmimi arnaatigisuusaassavaa erinarsortartoq Julie Berthelsen pingaarnertullu inuttaasup ikinngilluangaatut filmiliaritissaaq Angunnguaq Larsen, Chilly Fridayimi nipilersoqataasartutut aamma ilisarisimaneqartoq.

Peqataasussanilli suli amingaateqartoqarmat filmiliortarfik 3900 Pictures isiginnaartitsinermi piginnaaneqartunik suli ujaasivoq. Filmip aappagu aasakkut takuterngaarneqarnissaa siunertaavoq.