Takoriaannaangitsumik innarluutillit samminiaraat
Ukioq manna sapaatip akunnera 41, oktoberip arfineq pingajuanni aallartissaaq sapaammi oktoberip 14-ani naassalluni. Sapaatip akunnera taanna 'takoriaannaanngitsumik innarluutillit' pillugit paasisitsiniaanermut atorneqassaaq.
-Takoriaannaanngitsumik innarluutillit avatangiisiminnit tamatigut paasineqarneq ajorput, tassalu tamannarpiaavoq sapaatip akunneqartitsinermi sammisassat pingaarnersaat, taama nanoq.gl allappoq.
Takoriaannaanngitsumik innarluutit tassaapput, innarluutit qiviaannarlugit takuneqarsinnaanngitsut, innarluutillip avatangiisiminit 'ajoquteqanngitsutut' isigineqarajuttarneranik nassataqartartut.
Angajoqqaat sulisullu ADHD aamma autisme pillugit pikkorissartinneqassapput, tamanna pissalluni sapaatip-akunnera innarluutilinnut tunngatitaq sioqqutitsiarlugu.
Pikkorissartitsinerup pissusissamisuuginnartumik nanginneratut Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfiup kaammattuutigaa, sapaatip-akunnerani 41-mi Nunatsinni soqutiginnittut, peqatigiiffiit sulisullu assigiinngitsut innuttaasut 'takoriaannaanngitsunik innarluutillit' ajornartorsiutaat annertunerusumik sammissagaat.
