Tage Leegaard: Uggornaqaaq

- Uggornaqaaq. Uggornartuaannarpoq suleqatigiinnerit unitsinneqaraangata, Kalaallit Nunaammi suleqatigilluartarparput. Atsioqatigiinnikkut suleqatigiissinnaanngikkaanni attaveqaqatigiittuarsinnaanissaq neriuutigaara, Tage Leegaard oqarpoq.

Ataqqeqatigiinngittoqarnera partiillu politikkikkut tunngaviusumik assigiinngitsuunerat suleqatigiinnerup unitsinneqarneranut pissutaasut, Demokraatit siulittaasuata Jens B. Frederiksenip oqaatigaa.

Demokraatit Konservativellu 2007-imi aasap naajartulernerani suleqatigiinnissamik atsioqatigiiissuteqarput, taamanikkut siuttuusut Per Berthelsen aamma Bendt Bendtsen suleqatigiinnissaq atsioqatigiissutigigamikku.

Demokraatit inuk qiteralugu qilersorsimanngitsumik ingerlatsisuupput, tassa socialliberalitut imminnut taagamik.

- Tamanna konservatiivit politikkiannut assersuunneqarsinnaanngilaq, uagummi socialliberaliuvugut, konservatiivillu qanganitsanik pingaartitsisuullutik, Jens B. Frederiksen oqarpoq.

Kalaallit Nunaannut tunngassutilinnut Konservativet saqqummiussigaangata Demokraatit isumasioqqaarneqartarnissaat aallaqqaammut isumaqatigiissutaasoq, Jens B. Frederiksenip oqaatigaa, akerlianilli pisoqartarsimanerarlugu, Tage Leegaardilli tamanna pillugu oqaaseqarusunngikkallarpoq:

- Tassunga atatillugu oqaaseqarsinnaanngilanga, Jens B. Frederiksen oqaloqatigeqqaarlugu oqaaseqarusussinnaassaanga, Tage Leegaard oqarpoq.