Taekwondortartut angusaqarluartut

Czech Open weekendimi ingerlanneqartoq Tjekkiami illoqarfimmi Nymbuk ingerlanneqarpoq. Unammiuaarnermi unammisartut katillugit 400-t missaat peqataapput, nunanit aqqanillinnit aggertuullutik.

Nunarput sinnerlugu unammisartut arfinillit peqataapput. Taakkunannga unammeqataasut sisamat Nuuk Taekwon-do sinnerlugu peqataapput, unammisartullu marluk Nunatsinni Taekwon-dortartut Kattuffiat sinnerlugu siunissami piukkunnaatillit peqataallutit.

Arnat qernertumik qitequtillit unamminerini Sofie Skifte Nuuk taekwon-do klub sinnerlugu peqataasoq tul-imi Bronzennappoq.

Arnat qalipaatillit unamminerini Rasmine Geisler Nuuk Taekwon-do sinnerlugu peqataasoq frikamp-imi sølv pissarsiaraa kiisalu Tul-imi bronze pissarsiaralugu.

Peqataasut marluk, tassalu Villads Mølgaard aammalu Jannik Pedersen, siullermeerlutik nunat tamalaat unamminerini peqataapput.

Villads Mølgaard tul-imi kusanavissumik takutitsigaluarluni ingerlaqqinngitsoorpoq, unammisanilu dommerinit naligiitsinneqareerlutik saniatigut unammeqqereerluni.

Jannik Pedersen tul-imi unammisut 26-it akornanni peqataavoq. Tassani unammisani marluk ajugaaffigereerlugit ingerlaqqinngitsoorpoq.

Unammiartorneq pissarsiaqaataalluarpoq, angusarissaarfiullunilu unammisartut siullermeerlutik peqataanerat eqqarsaatigissagaanni.

Taekwon-domik unammisartut unammersuarneq tulleq peqataaffissaat aprilimi pissaaq, Europami pissartanngorniunnermi Grækenlandimi ingerlanneqartussami pissalluni.