Taekwon-Domik unammisartoq ukioq manna timersullammattut toqqarneqarpoq
Ukioq manna Timersullammattut toqqagaavoq taekwondo-mik unammisartoq Jonathan Jonathansen Sisimiuneersoq. Nunatsinni arlaleriarluni pissartanngorsimanermi saniatigut aamma ukiup ingerlanerani nunani tamalaani angusagissaarsimasoq.
Jonathan Jonathansen juulip qaammataani qernertumik qiteqateqarluni 4. dan anguaa, 20-iinnarnillu ukioqarluni Nunatsinni qernertumik qitequtillit 4. dan-imik angusisut inuusunnersaralugit.
Aamma Ukioq manna Aqutsisuullammak toqqarneqarpoq, tassalu Mikael 'Nukappi' Nathanielsen Ilulissani timersoqatigiiffimmit I-69-imeersoq, taannalu ukiorpassuarni qasujuilluni timersoqatigiiffimmik suliniuteqarsimanerminut nersorniarneqarpoq.
Badmintonimik sungiusaasoq Anga Peter Edvardtsen badmintonertartut peqatigiiffiannit 'Arsarnerit'-neersoq Ukioq manna Sungiusaallammattut toqqarneqarpoq. Narsap Nunatsinni badmintonimi angusarissaarneranut, taamatullu aamma marsip qaammataani Whitehorsemi Arctic Winter Gamesimut peqataatitsisinnaaneranut pissutaaqataalluinnarpoq.
Katuami tallimanngormat ualikkut akissarsititsisoqarnerani akissarsitinneqartut arlaannaalluunniit najuutinngilaq. Ukioq manna Timersullammattut toqqarneqartup akissarsiassaa Jonathan Jonathansenip qatanngutaanit Arnaq Jonathansenimit tiguneqarpoq.
Anga Peter Edvardtsen sinnerlugu Jørgen Peter Lyberth akissarsiassaanik tigusisuuvoq, Ukioq mannalu Aqutsisuullammattut toqqarneqartup 'Nukappi'-p pania Nivi Nathanielsenip tiguaa.
