Taekwon-domik pissartanngorniunnerit aallartipput
Taekwon-domik nuna tamakkerlugu pissartanngorniunnerit ullumi aallartipput. Ullumi ulloq aamma Kalaallit Nunaanni Taekwon-dortartut Kattuffiannut pingaaruteqarluinnartuuvoq, tassa kattuffik ukiunik 30-liimmat.
Allattoq Louise M. Kleemann
Unammiuaarnerit Nuummi ingerlanneqartut aallarnerlugit meeqqat tul-imi frikampimilu ullumi unammitinneqarput. Meeqqat anginerit inersimasullu tul-imi frikampimilu aqagu aqaguagulu unammitinneqassapput, arfininngorpallu nalunaaqutaq 20.30 pissartanngortut Nuup Timersortarfiani katerisimaarnermi ujaminnatsinneqassallutik.