Amerikap nunavittaani nunallit pissartanngorniunneranni kalaallinik pissartanngortoqarpoq.
Tae Kwon Do-rtartut Amerikap nunavittaani pissartanngorniunneranni, Amerika kujallermi naalagaaffeeqqat ilaanni Guatemalami ingerlanneqartumi, nunatsinnit peqataasut Lauritz Heilmann aamma Angutinnguaq Tittussen tamarmik guultinnapput.
Lauritz Heilmann Tae Kwon Do-mi periutsinik, tassa Tul-imik, Amerikap nunavittaani qernertumik qiterutillit 4 dan-it takutitsillutik unammineranni pissartanngorpoq.
Angutinnguaq Tittussen paalluni unamminerni aamma pissartanngorpoq, Tul-imillu unamminermi sølvinnalluni.
Unammisut sungiusaasuat Rita Helme unnersiorpoq Guatemalamiinnerminni ajunngitsorsuarmik pineqarlutik, kalaallillugooq unammileraangata Guatemalamiut illersuillutik nillialluartarnerat assut qiimmassaataasimasoq oqaatigaa.
Rita Helme Angutinnguaq Tittussenilu nunatsinnut ullumi utissapput Lauritz Heilmannilu USA-mi timmisartortartunngorniarluni ilinniarfigisaminut Floridamiittumut utissaaq.
Nunatsinni Taekwondomik nunani allani unammisartut 25-iupput. Amerikap nunavittaanut marluinnaat unammiartortinneqarput aqqut akisummat unammisartullu amerlanerit ilinniartuummata, Nuummi sungiusaasoq Mikael Kreutzmann Petersen oqarpoq.
Nunatsinni Tae kwon Dortartut pissartanngorniutissapput Sisimiuni sapaatip akunnerata tulliup naanerani, tassa oktobarip 26-ianiit 29-iat ilanngullugu.