- Assut pissagarsuaarpunga aamma unammeqatissakka assut kanuungamik, kanoorrattorsuungamik, Taatsiaq Gabrielsen KNR-imut oqarpoq.Assi: KNR / Nukaaka Tobiassen

Taatsiaq Gabrielsen nunatsinni angutini nukittunerpaaniartoq: Nukissannik katersivunga

Nunatsinni angutini arfininngorpat nukittunerpaaniuuttoqassaaq. Qulit unamminermut peqataaniarlutik nalunaarput.

Ukioq manna timersornermi pisoqarpallaanngilaq.

Coronap nunatsinni pissartanngorniunnissarpassuit kinguartillugillu taamaatiinnarpai, Nunatsinnili angutit nukittunerpaaniullutik unammillerniarput, tamatumalu ingerlanneqarnissaanut akuerineqarput: Aqagu arfininngornermi Fitness.gl KNR suleqatigalugu aaqqissuussineq nalunaaqutaq ualikkut marlunut aaqqissuunniarpaat.

27-nik ukiulik, Taatsiaq Gabrielsen Ilulissaneersoq peqataasussat ilagaat. Taanna Nuummi ullumikkut najugaqarpoq, taassumalu nukittuut allat unamminissaat qilanaaraa.

AAMMA ATUARUK Nunatsinni nukittunerpaaq rekordileerialersoq

- Assut pissagarsuaarpunga aamma unammeqatissakka assut kanuungamik, kanoorrattorsuungamik, Taatsiaq Gabrielsen KNR-imut oqarpoq.

Peqataasut oqimaassutsinik kivittaarinerni assigiingitsuni sisamani unammissapput.

Namminerlu nunatsinni siorna nukittunerpaaniuunnermiilli sungiusangaatsiarsimavoq.

- Sapaatit-akunneranut arfinileriarluta sungiusartarpugut, unammeqataasussaq oqarpoq.

Angulli nukittooq nukinik aamma sipaartariaqarpoq: 

- Qasuersaarluarniarsareqattaarpunga ullut sisamat sioqqullugit, nukissanik katersivunga, Taatsiaq Gabrielsen oqarpoq.

Taanna unamminermi aappassaa peqataalerpoq, ukioq mannalu unammineq corona pissutigalugu allaanerulaassaaq.

Nunatsinni angutini nukittunerpaaniuttoqarnissaa unammillissutigigaa

Fitnessgl-ip piginnittuata, Allan Juhlip killilersuisoqaraluartoq pissartanngorniutsitsisoqarnissaa ilungersuutigaa.

- Corona pissutigalugu allaanerusumik eqqarsartariaqarsimavugut. Unammersuaartitserusullunga oqarpunga malittarisassalli aamma malinniarpakka.

Ukioq manna pissartanngorniuttoqarnissaanut kommuninit allanit peqatasoqaqqusaannginnera aporfiuvoq. Kommunimmi killeqarfiinit allanit timersornermi aaqqissuussinernut nalunaaqqaarluni peqataaffiusussanut peqataajartorluni angalaqqusaanngilaq. Aporfillu tamanna Allan Juhlip qaangerpaa:

Nuummiit angutit sisamat peqataasussat allattorsimaffianniipput. Ilulissaniit peqatasussat aamma sisamaapput. Aamma Danmarkimiit marluk peqataassapput. Peqataasussalli Nuummut angalanngikkaluarlutik Nuummiit, Ilulissaniit Københavnimiillu toqqaannartumik aallakaatitsisoqassaaq. Tassa imaappoq Ilulissanit Københavnimiillu peqataasussat sumiiffigisaminniiginnassapput.

AAMMA ATUARUK Nunatsinni angutini nukittunerpaaq Danmarkimi angutit nukittunerpaat pingajorigaat

- Soorlu assersuutigalugu Nuummiit peqataasussaq siulliulluni kivitsisinnaavoq. Tamatuma kingorna Ilulissaneersoq kingornalu Københavnimeersoq. Tamanna toqqaannartumik aallakaatitsinikkut malinnaaffigineqassaaq.

Nunatsinni angutini nukittunerpaat akornanni oqimaassutsit pingasut unammiffiussapput:

90 kiilu ataallugu oqimaassuseqartut, 105 kiilu ataallugu oqimaassuseqartut pingajuilu 105 kiilu sinnerlugu oqimaassuseqartut.

Taatsi Gabrielsen 105 kiilu ataallugu oqimaassuseqartuniippoq. Taanna 101 kiilumik oqimaassuseqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat