Taasititsineq qinersinerlu immikkuussapput

Inatsisartunut juunip ulluisa aappaanni qinersisoqarnissaanik aalajangernerup Kalaallit Nunaat utaqqimaartilerpaalusooq.
apriilip 15-at 2009 14:14

Inatsisartut upernaakkut ataatsimiinnissaat, tallimanngorpat aallartittussaagaluaq, qinersisoqareernissaata tungaanut kinguartinneqarpoq, tassa Naalakkersuisut nutaat inissereerpata pisussanngorlugu.

Inatsisartunulli ilaasortat pilersaarutaareersutut tallimangorpat nalunaaqutaq ataatsimut katersuutissapput, inatsisartullu juunip ulluisa aappaanni ataatsimiinnissaat tassani taasissutigineqassaaq.

Inatsisartunut taasinissap ullulerneqarnerani imaalerpoq, Nunatsinni marloriarluta ullualunnguit ingerlanerinnaanni qinersiartortariaqassasugut. Tunngaviusumik inatsisip allanngortinneqarnissaa, taamaalillunilu kunngissat angutit arnallu naligiissitaalernissaannut inatsit pillugu, kalaallit juunip ulluisa arfineq-aappaanni ilisimaneqareersutut taasisinneqassapput. Taamaammat eqqumiigineqarsinnaavoq, Inatsisartunut qinersinissaq Naalakkersuisut siulittaasuata, Hans Enoksenip, ulloq taanna sooq pisussanngortinnginneraa.

Tassunga tunngatillugu Hans Enoksen Radioaviisimut ima oqarpoq:

- Taasisitsinissat marluk taakku imminnut attuumassuteqanngillat, uangalu kissaatiginngilara, Inatsisartunut qinersinerup taasisitsinermit allamit akornusersorneqarnissaa.

Qinersinerup taasisitsinerullu ataatsikkut pinissaat naleqquttuullunilu aningaasatigut iluaqutissartaqartoq Hans Enoksenip oqaaseqarfigiumanngilaa.