Taasissussisut ulluni 14-ini peqataasassanngillat

Inatsisartunut ilaasortat arlallit taasinerni peqquserluttuliorsimanerat Inatsisartut siulittaasoqarfiannit iliuuseqarfigineqaraluarpoq, inatsisartunulli ilaasortat maannamut pingasut peqquserluttuliorsimanerminnik nassuereeraluartut, Inatsisartut ukiaanerani ataatsimiinneranni qanoq iliuuseqarfigineqarnavianngillat.

Inatsisartunut ilaasortat ilaasortaqatiminnik najuutinngitsunik taasissussisarsimanerannik suliap killiffia pillugu Inatsisartut siulittaasoqarfiat ippassaq nalunaaruteqarpoq.

Taasissussisarneq inatsimmik unioqqutitsinerunersoq pillugu immikkut ilisimasalimmik avataaneersumik misissuisitsineq Inatsisartut siulittaasoqarfiata sapaatip-akunnerup massuma ingerlanerani aallartikkaa nalunaarutigineqarpoq, misissuinerullu inernera sapaatip-akunnerata ataatsip marlulluunniit ingerlaneranni saqqummiunneqarsinnaanissaa naatsorsuutigineqarpoq.

Kalaallit Nunaanni politimesterip suliamut akuliutsinneqarnissaanut tunngavissaqarnersoq siulittaasoqarfimmit isummerfigineqassasoq, Inatsisartut siulittaasuat Ruth Heilmann oqarpoq.

Inatsisartut suleriaasiat allanngortinneqassanersoq pillugu siunnersuut Inatsisartuni ippassaq taasissutigineqarmat inatsisartut tamarmiullutik akuersipput.

Inatsisartuni pissuserissaarnissaq pillugu maleruagassat unioqqutinneqarnerannut atatillugu Inatsisartut Siulittaasoqarfiat killilerujussuarmik maannamut periarfissaqarsimasoq, Siulittaasoqarfik allappoq, pingaartumillu Inatsisartut ataatsimiittarfianni qarasaasiakkut taasisitsisarnermut atortunik atuilernermi tamanna naleqqutinngitsoq oqaatigalugu. Peqataasussaajunnaarsinneqartut aningaasarsiassaqassanngitsut aamma siunnersuutigineqarpoq.

Taamatut akuliunneq pillaanertut iliuuseqarfiginninnertut pissuseqarmat naatsorsuutigineqarportaaq pinerluttut eqqartuunneqartarnerannut tunngaviusut innimigalugit aalajangersagaq atorneqassasoq.

Allannguutitut siunnersuutip aningaasaqarnikkut allaffissornikkullu kinguneqannginnissaa aamma siunniunniarneqarpoq.

Inatsisartut immikkut ittumik nalunaaqutaq ataatsinut ataatsimiilerpata, oqaluuserisassat ippassaq angumerineqanngitsut oqaluuserineqassapput.