Taasisinnaatitaaneq nalilersorneqaqqittariaqarpoq
Maniitsumi tamat oqartussaanerata suliartortorpassuarnit nikisinneqarsinnaanera upalungaarsimaffiginiarlugu
qinersisinnaanermut inatsit isummerfigineqartariaqartoq Gert Broberg Lynge NUSUKA-p siulittaasua isumaqarpoq.
Gert Borberg Lynge isumaqarpoq Maniitsup kommuniani innuttaasut tamat oqartussaanerat illersorneqartariaqartut, tassami suliartortussat amerlasuupilussuummata.
Aluminiuliorfimmi sulisut amerlanerpaaffimminni 5500-it missaanniittussaassapput. Kingullermik qinersisoqarnerani Manitsup Kommuneani taasisinnaasut 2427-upput, taamaalilluni suliartortut tikittussat amerlanerussuteqalersinnaassallutik.
Malittarisassat Namminersornerullutik Oqartussani inatsisilerituumit Leif Scharlingimit imak nassuiarneqarput:
- Qinersineq sioqqullugu sapaatit akunnerini arfinilinni kommunimi najugaqarsimassaaq, danskillu naalagaaffiani innuttaasuussalluni, qinersinerlu sioqqullugu Kalaallit Nunaanni qaammatini arfinilinni najugaqarsimassaaq, imaluunniit naalagaaffimmi ukiuni pingasuni najugaqarsimanissalluni.
Leif Scharlingip erseqqissarpaa kommunimut qinersinermi inatsit inatsisartuninngaanniit allanngortinneqaarsinnaammat.