Taasinerup kingorna Kirgisistanimi nuannattoqarpoq

- Kattussimalluta nunarsuarmut takutikkusupparput, Kirgisistanimi aattaqaqisumik eqqissiviilliortoqareernerani pisortaagallartoq oqarpoq.

Inuiaalli aattaqaqisumik aporaannernik eqqorneqarneranit Asiap Qiterpasissuani kunngiitsuuffimmi inunnik taasisitsineq isornartorsiuisartut siusippallaarnerarpaat.

Nunami naalakkersuinikkut aaqqissuussinerup nutaap Kirgisistan tassaalersissavaa Sovjetunioniusimasumi Asiap Qiterpasissuani inatsisartut suliaannik siullerpaalluni demokrateqalersitsisoq.

Inunnik taasisitsinermi innuttaasut 60 procentii sinnerlugit taasisimassangatinneqarput.

- Katsimanerput nunarsuarmut tamarmut takutikkusupparput, Kirgisistanimi pisortaagallartoq, Rosa Otunbajeva, Kirgisistanip kujasissuani illoqarfimmi Osjimi taasigami oqarpoq.

Eqqissiviilliornerit ajornerpaat illoqarfimmi Osjimerpiaq qaammammi uani siusinnerusukkut pipput.

Inuiaat kirgistanimiut usbekistanimiullu aporaammata inuit hundredelikkuutaat toqutaapput.

Usbekistanimiut titusindtilikkaat Kirgisistanip kujasissuaniit qimarrapput. Akersuunnerilli unitsinneqarmata qimaasut amerlanersaat uteqqipput.