Taarsiissutissat ernummatigineqalersut

Canadami nunap inuiisa siuttuisa aarleqqutigilerpaat, canadap naalagaaffia nunap inuiinut aningaasanik taarsiippat kingunerloratarsinnaanera.

Canadami Inuit Indianerillu pinngitsaalillugit kostskolertitaasimasut canadap naalagaaffiata aningaasanik taarsiiviginialersaarpai.

Aningaasani taarsiissutigineqartussani tapit ilanngunnagit 10.000 dollarit tunngaviussapput, tassa koruuninngorlugit taakku 50.000 koruuninik naleqarput, taakku saniatigut ukioq ataaseq kostskole-miissimanermut 3.000 koruunit tapigitinneqassapput.

- Pisuunngortoqassappallu pisuunngortussat tassaasussaassapput eqqartuussisut suliamik tamatuminnga suliaqarsimasut, taama Inuit siuttuat aviisimut Nunatsiaq News-imut issuarneqarsimavoq.

Nutaarsiassaqartitsivillu CBC naapertorlugu Indianerit najugaanni aningaasanik atukkiisartut Indianerinut atukkiisinnaasutut neqeroortut arlallit takkussuussimapput, oqaatigineqarporlu taakkunannga atoraanni erniakkaarujussuussasut.

- Nunaqqatigut mianersoqqusariaqarpavut, taarsiivigitinnerit akisoorujussuanngorsinnaanerannik, Indianerit siuttuat CBC-mut taama oqarsimavoq.