Taarsiinissaq paamaarunneqarpallaartoq
Arnaq persuttartinnermi kingorna taarsiivigitinniarluni 2005-imi qinnuteqarmat, qinnuteqaataa aalajangersaasartut ukiut tallimat sinnerlugit suliaraat. Tamanna akuerineqarsinnaanngitsoq, ombudsmandi erseqqissaavoq. Folketingimi Eqqartuussiveqarneq pillugu ataatsimiititaliaq, aamma Inatsisinik atortitsinermut tunngasunut ministeri, folketingip Ombudsmandiata pisoq pillugu ilisimatereerpai.
- Suliami ataatsimi kukkusoqarsimatillugu Folketingimi Eqqartuussiveqarneq pillugu ataatsimiititaliamut ombudsmanditut qaqutigorujussuaq saaffiginnittarpunga. Unali pisoq ajortorujussuartut isigaara. Taamaammat Folketingimut saaffiginnippunga, ajornartorsiutit tassanngaanniit aaqqinneqartariaqarmata, ombudsmand, Hans Gammeltoft-Hansen, oqarpoq.
Taarsiivigitittarneq pillugu aalajangersaasartut sullissinernut piffissaliisalernissaat, taassuma ilanngullugu siunnersuutigaa.
Sullissinerup nalaani arlalinnik kukkusoqarlunilu sumiginnaasoqarsimavoq. Soorlu taarsiivigitinnissamut aalajangersaasartut arnaq peqqusimavaat suliap piareersarneqarnerani illersuisussarsioqqullugu, illersuisualu attaveqarfissaanik kukkullutik aamma innersuussimallugu. Kukkuneq taanna ukioq ataaseq qaammatillu qulit qaangiummata aalajangersaasartut aatsaat iluarsivaat.
Taama pisoqarmat taarsiivigitinnissamut aalajangersaasartut Inatsisinik atortitsinermut ministereqarfiup erseqqissaavigai, illersuisut piareersaasoqartillugu suliakkerneqartussaanngitsut, sullissinissamullu piffissaliussaq qanoq ililluni sivikillineqarsinnaanersoq, aalajangersaasartut peqatigalugit oqaluuserineqassasoq erseqqissaatigalugu.
