Taarsiiffigitinnissamut itigartitaapput
Hingitaq 53-imi ilaasortat tallimat eqqartuussinermi siullermi ilaanngitsoorsimasut tamarmik immikkut 250.000 kr.-nik taarsiiffigitinnissamik piumasaqaataat, Østre Landsretimi ullaaq itigartitsissutigineqarpoq. Taamaalilluni inatsisileritooq Christian Harlang Højesteret-imut ingerlatitseqqinniarluni aalajangerpoq. Eqqartuussinerup inernera pillugu Inuit Issittormiut Kattuffiata nunatsinni præsidentia Aqqaluk Lynge oqarpoq taama inerneqarnissaa ilimagereeritsik.
-Suliassanngortaq una allallu siornatigut suliassanngortinneqarsimasut Eqqartuussiviit Qullersaannut Højesteretimut ingerlateqqinneqassapput, tassanilu paasinarsissaaq, paasissutissanik nutaanik saqqummertoqassanersoq allaanerusumillu aajangertoqassanersoq, Aqqaluk Lynge erseqqissaavoq.
Suliassanngortitat allat 600-it missaanniittut Hingitaq-p inuit pisinnaatitaaffii pillugit eqqartuussivissuarmi Strassbourgi uninngapput, Østre Landsretimilu ullumi suliat Højesteretimut ingerlatinneqareerpata Strassbourgimut ingerlateqqinneqarnissaat naatsorsuutigineqarpoq.
