Taarsiiffigineqarnissaminnik piumasaqaraluarput

Bosniami illoqarfimmi Srebrenicami 1995-imi muslimit angutitaannik nukappiarartaannillu 8000-inik toqoraanermut Holland akisussaatineqarsinnaanngilaq. Haagimi eqqartuussiviit ilaat ullumi taama aalajangiivoq. Taamaalilluni Bosniamiut toqoraanermi annattuusut toqoraaneq pillugu Hollandimik unnerluussinerat ilumuunnginnerarneqarpoq.
Allattoq Louise M. Kleemann
septembarip 10-at 2008 14:20

Ilaatigut anaanat Srebrenicamiut, angutinut nukappiaqqanullu toqorarneqartunut ilaqutaasut, eqqartuussivitsigut taarsiiffigineqarnissaminnik piumasaqaraluarput.

Srebrenica qimaaffissatut isumannaatsutut nalunaarutigineqareersorlu, Naalagaaffiillu Peqatigiit sakkutuuinit Hollandimiuusunit nakkutigineqarnerata nalaani, Angutit nukappiaqqallu Bosniamiut Serberillu sakkutuuinit toqorarneqarput.

Taamaattorli angutit nukappiaqqallu 8000-it qimarngunneqarmata kingornalu toqorarneqarmata, Hollandimiut sakkutuui iliuuseqarsimanngitsut oqaatigineqarpoq. Tamannalu taamanili sakkortuumik isornartorsiorneqalerpoq.

Kisianni tassa eqqartuussivik ullumi aalajangiivoq, Hollandimiut sakkutuui akisussaatinneqarsinnaanngitsut. Aamma ukiormanna juulip qulinganni Haagimi eqqartuussivik aalajangiivoq, Naalagaaffiit Peqatigiit Srebrenicami toqoraanermut akisussaatinneqarsinnaangitsut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq