Taarsigassarsineq akiitsorpassuaqalersitsisinnaavoq

Norskit piviusulersaarusiaanni nutaami nunarsuarmi piitsunut imminut ikiorsernissaq siunertaralugu aningaasanik taarsigassarsisitsisarneq ilumut saqqummiunneqartartutut iluaqutaatiginersoq apeqquserneqarpoq.
decembarip 01-at 2010 13:36

Paasinarsivormi, imminut ikiorsernissaq siunertaralugu aningaasanik taarsigassarsineq amerlasuunik akiitsoqalersitsisinnaasoq.

Nunarsuarmi piitsut millionilikkaat imminut ikiorsernissaq siunertaralugu aningaasanik taarsigassarsisimapput, amerlanertigut amerlanngitsuinnarnik taarsigassarsisarput, inuit ilaannut nutaamik inuuneqalernermik taarsigassarsineq kinguneqartarpoq, allanulli akiitsoqartuaannalernermik aallartitsisinnaasarluni.

Norskit piviusulersaarusiaanni nutaami tamanna takuneqarsinnaavoq, piviusulersaarummi Bangladeshimi ineriartorneq sammineqarneruvoq, nunarsuarmi tusaamasaq Grameen Bank innuttaasunut 8 millioninut taarsigassarsisitsisimavoq.

- Siullermik ataasiinnarmik taarsigassarsivunga, nutaamilli taarsigassarsisariaqarsimavunga siulleq taarsersinnaajumallugu, maanna assigiinngitsunut tallimanut akiitsoqarpunga, Yasmeen nunaqarfiit ilaanneersoq taama oqarpoq.

Taassumalu oqaluttuaa amerlasuut oqaluttuaannut assinguvoq, Grameen Bankimut taarsigassarsinikut akilersuisinnaajumallutik allanik taarsigassarsisariaqartartut filmimi takuneqarsinnaavoq.

Erniat ukiumut 100 procentiusinnaasarnerat ajornartorsiutaavoq.

Inunnut amerlasuunut atukkiisimanermut aningaasartuutit annertuneri Grameen Bankip erniat taama annertutiginerannut nassuiaatigaa.

Imminut ikiorsernissaq siunertaralugu aningaasanik taarsigassisarnerup piitsuunermik nungusitsisinnaaneranik ineriartortitsinermut paasisimasallit amerlasuut qulartut, piviusulersaarutip takutippaa.

Tamakku ilagaat Ha Joon Chang Cambridge Universitet-imeersoq:

- Ajuusaarutigaara oqassallunga, nunalli ineriartornermut ikiuerusuttut, ingammik nunat Skandinaviameersut, salloqittagaasimapput periaaseq taanna piitsuussusermut nungusitsisinnaanerarlugu, Ha Joon Chang oqarpoq.