Taarsigassarsiat erniaasa akileraarnermi tamakkiisumik ilanngaatigineqartarnerat ullumi eqquteqqinneqassaaq
Siumut ingammillu Atassut nuannaarput, uffa IA pissaqareersunut tapersiinertut isigisaminnut aliasuttut.
- Tamatta aningaasaatitsinnit 12 millionit koruunit inuiaqatigiinni atugarissaarnerpaanut tunniunneqarput, inuiaqatigiit pisuujunerulernissaannik kinguneqanngitsumik, IA-meersoq Naaja Nathanielsen oqarpoq.
Taanna Inatsisartut aningaasaqarnermut ataatsimiititaliaani, siunnersuummik suliaqaqammertumi, ilaasortaavoq.
Ataatsimiititaliamilu sulineq IA-mit naammagineqanngilaq.
- Naalakkersuisut siunnersuutip pingajussaanniinnginnerani kissaateqarfigaagut, nalilersueqqullugit, siunnersuut una nammineq ineqarusuttunut pitsaasunneranik oqarnerminnut tunngavilersuutaasussamik. Kisianni tunmngavilersuutinik apuussaqanngillat, Naaja Nathanielsen oqarpoq. Taassuma Akileraartarnermut atugarissaarnermullu isumalioqatigiititat inerniliussaat isumaqatigineruai.
GA-p pisortaa Brian Buus Pedersen akerlianik isumaqarpoq, taarsigassarsiat erniaasa akileraarnermi tamakkiisumik ilanngaatigineqaqqittalernissaat eqarsaatigilluagaasoq.
- Siorna allannguineq isumaqatiginngilarput, taamaammallu aaqqiineq ajunngilluinnarpoq. Aamma oqarpugut, inissiaqarnerup aningaasalersorneqarnera eqqarsaatiginiaraanni, taava ineqarneq pillugu sukumiisumik iluarsaaqqittoqartariaqartoq. taamaalillunimi pisutsit imminnut sunnerartarnerat sutigullu tamatigut ataqatigiinnerat takuneqarsinnaalissaaq, Brian Buus Pedersen oqarpoq.
SIK-p siulittaasua, Jess G. Berthelsen, taarsigassarsiat erniaasa akileraarnermi ilanngaatigineqartarnerat millieqarmat aallaqqaammut nuannaarutigigaluarpaa, allannguinerlu neriuutigisaanik malitsieqanngilaq.
- Atorunnaarsinneqarmat neriuutigisimagaluarparput inissianik sanaartornermut akissaqarnerusoqalissasoq, tamannali pisimanngilaq.
Taamaammat Jess G. Berthelsen isumaqarpoq, aarsigassarsiat erniaasa akileraarnermi tamakkiisumik ilanngaatigineqaqqittalernissaat isumatusaarnerusoq, inissianit attartortakka akisummata ilaasortani taamaalillutik namminneq initaarnissamut periarfisasqalissasut neriulluni.