Taarsersuinerit imaaginnavipput
Naalakkersuisut siulittaasuata Aleqa Hammondip naalakkersuisoqarfianit mail-ikkut KNI-p pisortaaneranut nassiunneqartumi atuarneqarsinnaavoq, KNI-p siulersuisuini siulittaasoq Michael Skourup siulittaasullu tullia Vagn Andersen KNI sapaatip akunnerata tulliani ataatsimeersuarnerani tunuartinneqarumaartut.
Vagn Andersenip Atuagagdliutinut erseqqissatigaa, tunuartitaanissaminut tunngassuteqartumik saaffigineqarsimanani.
Tulluanngitsutut pissusissamisuunngitsutullu isigaara.
Paasissutissat taama ittut mail-ikkut kopi-lerlugit nassiunneqarnerat periaasiuvoq eqqumiitsoq tamatumunngalu suna tunngaviunersoq eqqarsarnarpoq, Vagn Andersen Atuagagdliutini apersorneqarluni oqarpoq.
Vagn Andersen KNI-p siulersuisuini ukiuni arfineq marlunni ilaasortaavoq.
KNI-p 2006-imi aningaasaqarnikkut ajutoornerata kingorna Vagn Andersen suliffeqarfiup aningaasatigut siumut aallartinnissaanut suleqataavoq. KNI 2006-imi milliardit koruuninik amigartooruteqarpoq.
KNI piffissami kingullermi 40 millionit koruuninik sinneqartooruteqarpoq piginnittullu 20 millionit koruuninik iluanaaruteqarlutik.
- Niuernikkut tunngassuteqartut pillugit siulersuisuni tunuartitsiniarneq pissuteqarsinnaanngilaq, allaasimasinnaavoq, Vagn Andersen Atuagadliutini taama issuarneqarpoq.
KNI-p siulersuisuini siulittaasup Michael Skourupip Atuagagdliutinut uppernarsarpaa, siulittaasup tullianut mail-ikkut nassiussap kopi-anik aamma nassinneqarsimalluni.
- Soorunalimi ajuusaarutigaara, Michael Skorup oqarpoq, pineqartorlu pillugu annerusumik oqaaseqarumanani.
Atuagagdliutit paasisaat naapertorlugit naatsorsuutigineqarpoq KNI-p siulersuisuini ilaasortanngortussat tassaassagunartut Islandimiu niuertoq aamma Halibut Greenlandip pisortaa Niels Thomsen aamma Svend Hardenberg Naalakkersuisut siulittaasuata Aleqa Hammond-ip naalakkersuisoqarfiani pisortanngorlaaq.