Sara Olsvig: Taamatut pisoqaqqinnissaa kissaatiginngilara
Qujaukitsoq Politikenimi apersorneqarnermini Canadamilu ataatsimiinnermini oqariartuutigisimasani pillugit akunnerit pingasungajaat naalakkersuisunut naveersinneqaatigai, oqaatigisimasanilu nammineq illersorlugit.
AAMMA ATUARUK Danmarkip anneruniarnera aserorsaataalluinnarpoq
Danmarkimut isornartorsiornermut paasinninneq
Inuit Ataqatigiit siulittaasuat, isumaginninnermut naalakkersuisoq Sara Olsvig, naalakkersuisut ataatsimiinneranni Qujaukitsumut naammaginninnginnerminik annitsivoq.
- Taamatut akeqqissimaarpalulluni ilaatigut suleqatigiiffinni assigiinngitsuni periuutsini tunngasuni, nunatsinniik nipeqarneq Inuit Ataqatigiinniik akuersaanngilarput, aammalu tamakkuninnga oqariartussagaanni soorunami piumasarigivarput naalakkersuisuni eqqartorneqaqqaarsimanissaat, Sara Olsvig oqarpoq.
Erseqqissarpaalu Vittus Qujaukitsup oqaatigisimasai arlariinnik ajornartorsiutitaqartut, tassa Qujaukitsup danskit naalakkersuisuinut isornartorsiornera, Sara Olsvigip ilaatigut isumaqatigisinnaasaa, saqqummiunnerali torernerusinnaasoq.
- Pineqartut assigiinngitsuummata erseqqissarusuppara, siullermik danskit aviisianni Danmarki pillugu oqariartuutit taakkua imarisaatigut paasinarluinnartutut nalilerpakka, naak nipi atorneqartoq tulluartutut Inuit Ataqatigiinniit isiginngikkaluaripput, Sara Olsvig oqarpoq.
AAMMA ATUARUK Nunatta aningaasatigut imminut napatilernissaanut Trumpip ikiorsinnaavaatigut
Canadami oqalugiaat pillugu isornartorsiorneq
Qujaukitsup Arctic Circle Forumimi Quebecimi oqalugiaataa Sara Olsvigip naammagingilluinnarpaa, isummanik Naalakkersuisuni isumaqatigiissutigeqqaarsimanngisaminnik saqqummiussisimammat.
- Tassa ilaatigut oqaatigineqartut ilai aamma suleqatigiiffinni allani, nunani tamalaani akornani suleqatigiiffiinni allani, oqaatigineqartut ilai naalakkersuisuni eqqartorneqaqqaarsimanngimmata ilaatigut taama nipilerlugit oqaatigineqarsimammata Inuit Ataqatigiinniit tupaallassutigaagut, Sara Olsvig oqarpoq.
Taamatullu pisoqaqqinnissaa Sara Olsvigip kissaatiginngilaa.
- Erseqqissumik Inuit Ataqatigiinniik oqaatigisarput tassaavoq, pissuserineqartoq torinngitsoq taanna akuerinngilarput, siunissamilu taama ilisoqaqqinnissaanut kissaatiginnilarput, Sara Olsvig Naalakkersuisut ataatsimiinnerisa kingorna taama oqarpoq.
Vittus Qujaukitsup tamanna pillugu nassuiaanera unnugu arfineq marlunut Qanoruukkut isiginnaarsinnaavat.
