Taamaatitsinerpassuarnut aajuna nassuiaat
Kujataani taamaatitsisarnerit arlaqarmata eqqorpoq, isornartorsiuisulli arlallit oqarnerattut, taamaatitsinerit 87 procentiunerarneqarnerat eqqunngilluinnarpoq. Air Greenlandimi niuernermut pisortaq, Christian Keldsen, taama erseqqissaavoq.
Kujataani sapaatip-akunnerini kingullerni pingasuni silap ajoqusersuingaatsiarnera taassuma tikkuarpaa, timmisartuussinernillu eqquisunik teknikkikkut ullut marluk aamma ajornartorsiuteqarsimanertik aamma oqaatigalugu.
- Qulimiguullilli Bell 212-it Kalaallit Nunaanni timmisartuussissutitut atorneqarsinnaannginnerarlugit oqassalluni eqqunngilaq, taanna oqarpoq. Kujataanilu timmisartuussisarnerit, timmisartuussinissanillu taamaatitsiinartariaqartarnerminnut, silap qanoq issimaneranik takussutissanik Christian Keldsen aamma ilanngussivoq.
Tassani takuneqarsinnaavoq Narsarsuarmit taamaatitsiinnarnerit ukioq-manna 35 procentiusut, siorna 44 procentiusimallutik.
Narsamit timmisartuussinissat taamaatinneqartut 47 procentiupput, siorna 34 procentiusut.
Qaqortumit taamaatitsiinnarnerit qaammammi matumani 46 procentiupput, siorna 38 procentiusimasut, Nanortalimmiillu taamatitsiinnarnerit ukioq-manna 48 procentiupput, siorna taamaallaat 24 procentiusimallutik.
Ilaasussalli amerlanertigut kingusinnerusukkut timmisartuussinernut ilaatinneqartarmata, Air Greenlandimit erseqqissaatigineqarpoq.
Taamaatitsisarnerit taaneqareersutut silamik pissuteqarnerusarput, taamatullu pisoqartillugu annikinnerusumik eqquinissaq eqqarsaatigalugu arlaleriarlutik Kujataani illoqarfiit nunaqarfiillu akornanni AS350-it atortaritik Air Greenlandip aamma erseqqissaatigaa, Bell 212-it ilaasunik kinguaattoornernit imaluunniit taamaatitsinernit eqqugaasunut taamaalillutik atorneqarsinnaaniassammata.