Taamaammat sukkornermik nappaateqartoqalersarpoq
Peqqinnanngitsumik inuuneqarnikkut pualavallaalertarneq, nerisassanik peqqinnanngitsunik nerisaqarnikkut, timimillu atuinngippallaarnikkut, type 2-mik sukkornermik nappaateqalernermik kinguneqarsinnaammat, qangali ilisimaneqarpoq.
Inuilli ilaasa allanut naleqqiullutik inunnguutsiminnik sukkornermik nappaateqalernissamut qaninnerusarnerat, ilisimatusarnermi matumani ersersinneqarpoq.
Ilisimatuut Københavnip universitianeersut aamma Københavnip Universitet-iani Steno Diabetes Centerimilu ilisimatuut mississuinerminni
timip sananeqaataanik allaassutilimmik, nunatsinni innuttaasut akornanni type 2-mik sukkornermik nappaateqalersinnaanermut peqqutaasumik nassaarput.
Ilisimatusarnikkut paasisat nalunaarusiorneqarnerat, Kalaallit Nunaanni Peqqissutsimik Ilisimatusarfimmit suliarineqartoq saqqumiunneqaqqammerpoq, nalunaarusiaq Københavnip Universitet-iani Steno Diabetes Centerimilu ilisimatusarfik suleqatigalugit suliarineqarpoq.
Kingornussisaat TBC1D4, nukiit sananeqaataasa sukkumik atuisinnaanerannut sunniuteqartartoq, taamaallaat kalaallini maannamut nassaarineqarpoq.
Kingornussisaatip taassuma nerereernermi sukkut nukinnukartussaagaluit annikinnerutittarpai, aap akuata qaffasippallaartumik sukkoqalertarneranut pissutaaqataasarluni.
Ilisimatuussutikkut paasisat nutaat peqqissutsimut attaveqarnermullu Naalakkersuisup Steen Lyngep oqaatigai, peqqinnartumik inuuneqarnikkut, sukkortunngornissaraluamut pinngitsoortitsisinnaasut, ukiunilu marlunni tulliuttuni Inuuneritta II-mi inuiaat inuunerinnerulernissaannik anguniagaqarluni nerisat aamma timimik aalatitsineq immikkut sammisassatut qitiutinneqassasut, Steen Lynge oqarpoq.