Nunarsuaq tamakkerlugu atuartut - aamma nunatsinni - marsip qiteqqunnerani silap pissusiata allanngoriartornera pillugu akerliussutsimik takutitsipput. Akerliussutsimik takutitsineq taaguuteqartinneqarpoq FridaysForFuture, atuarnertillu unitsillugu inuit pilersitaannik silap pissusiata allanngoriartornera pillugu marsip 15-iani akerliussutsimi takutitsipput.Assi: Ane-Marie Petersen

Theilgaard silap pissusiata oqallisigineqarnera pillugu: Taamaammat nalornisoqarpoq

Inuussutissarsiornermut nukissiuuteqarnermullu naalakkersuisoq silap pissusiata allanngoriartornera inunnit pilersitaasorinagu oqareertoq, sooq silap pissusiata allanngoriartornera inunnit pilersinneqanngissorineqartartoq ilisimasallip nassuiarpaa.

Inuussutissarsiornermut nukissiuuteqarnermullu naalakkersuisup, Aqqalu Jerimiassenip, silap pissusiata allanngoriartornera inunnit pilersitaasorinagu oqarnera inuit internetikkut attaveqaqatigiiffiisigut oqallitsitsisorujussuuvoq.

Ilisimatuulli kukkunersut sooq oqallisigineqartarpa?

Ilisimatuut 97 procentii isumaqatigiikkaluartut 3 procentii allamik isumaqarpata nalornisoqarsinnaavoq.

- Tamanna ilisimatuussusermi paasisat eqqorluartuusuaannannginnerannik pissuteqarpoq, silap pissusia pillugu ilisimalikkanik paasissutissiisartoq DR-imilu ukiuni 27-ni silasiortutut silallu pissusianik immikkut ilisimasalittut sulisoq Jesper Theilgaard oqarpoq.

Silap pissusiata allanngoriartornerata inunnik pissuteqarneranik ilimasuutit 1800-kkunni ilisimasatoqqanit tunngaveqarput. Tassani tunngavigineqarluni gassit nunarsuup silaannaanik kissatsitsiartortartut, soorlu CO2-p, metanip erngup aalaata allallu silaannarmiinnerisa kiak nunarsuatsinnit aniasussaagaluartoq nunarsuatsinniiginnartittaraat.

Tassalu mingutsitsinerujartortoqartillugu seqerngup qinnguai, taakkualu kissarnerat, nunarsuarmit aneqqissinnaajunnaariartussapput. Kissarnerullu tassanngaanneertup nunarsuarmut sunniutai assigiinngillat, taakkulu silap pissusianik allanngoriartortitsipput.

- Nunarsuup nukik taanna sumut atussaneraa uagut aqussinnaanngilarput. Nukiup ilaa sikumik aatsitsisarpoq ilaalu sialunngortussamik aalartitsisarluni. Pisartut assigiinngitsorpassuupput, tamarmilli assigiinngitsunik arlalinnik kiannerulersitsisunik gasseqarneratigut nukimmik alliartortoqarneranit aallaaveqarput, Jesper Theilgaard oqarpoq.

AAMMA ATUARUK Silaannaap kissakkiartornera imatut upperinngilara

Seqineq pisuuvoq

Aammali ilisimatooqarpoq, nunarsuup silaata pissusissamisoortumik kiannerulertarlunilu issinnerulertarneranik nassuiaasartunik.

Niels Bohr institutimi ilisimatuup Henrik Svendsmarkip ilimagisaa Jesper Theilgaardip assersuutigaa.

- Seqerngup seqerngullu nunarsuarmik illersuinerata allanngorarneri silap pissusaanik allanngortitsisut Svendsmarkip ilimagisarivaa, Jesper Theilgaard oqarpoq.

Aammali tamanna assortuussutigineqarpoq.

- Nassuiaat taanna silaannarsuaq pillugu ilisimatusarnermit silasiornermiillu isigalugu eqqunngitsoq uanga nammineq isumaqarpunga, Jesper Theilgaard oqarpoq.

Imaq

Atlantikup maanna nillernerunera aallaavigalugu aamma ilimasuuteqartoqarpoq. Atlantikup maanna nillernerulersimasoq, tamannalu pissutigalugu Ilulissat kangiata sermiata alliallassimaneranut nassuiaatigineqartartoq, Jesper Theilgaard oqaluttuarpoq.

- Kisianni taama allanngorartoqarnera pissusissamisoortuuvoq. Taava ilisimatuut ilaqarput oqartunik pissusissamisoortumik allanngorartoqarmat, tassa taannaasimassasoq silap allanngoriartornera, Jesper Theilgaard oqarpoq.

Aamma politikkikkut aalajangersimasumik anguniagallit silap pissusiata allanngoriartornera inunnit pilersitaannginnerartarpaat, silap pissusiata allanngoriartornerata akiorneqarnissaanut malittarisassaliortoqassappat inuit ulluinnarni atugaannut kinguneqarpallaassammat.

AAMMA ATUARUK Nunarsuup kissatsikkiartorneranik naalakkersuisup qularisaqarnera Aajap isornartorsioraa

Taava aamma inoqarpoq ima oqarnermik paasiuminartitsinerusut; silap pissusiata allanngoriartornera pissusissamisoortumik allanngorarnerusuusoq, uagut iliuuseqarfigisinnaanngisarput.

- Ajornakusoorpoq. Uagut allanngoriartornermut pissutaagutta taava qanoq ilissaagut? Iluarsiniagassaq angivallaarpoq passunnissaalu ajornakusoorpallaarluni, Jesper Theilgaard oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat