Paasisat nutaat: Taamaammat appat piaraat innamit imminut igittarput
![](/sites/default/files/styles/image_934x467/public/article_images/lomvie_appa_med_unge_foto_seth_m_flickr.jpg?itok=hjEoccOf)
Nittartagaq Videnskab.dk taama allaaserisaqarpoq.
Appat piaraasa alliartornermik sisamararterutaa angugaangamikku innami qutsissupilussuarmi ullutik qimattarpaat. Timmisinnaanngikkaluarlutillu meterinik hunnorujunik arlalinnik qutsitsigisimit imaanut imminnut igittarput.
Taamatullu pissuseqarnerat ilisimatuut paasiuminaatsissimavaat. Danskilli ilisimatuuisa misissuinerisa nutaap paasinarsitippaa sooq taamaaliortarnersut.
Appammi angutiviartaannut piaqqaminnik paarsisunut iluaqutissartaqarpoq. Appat sulumik nalunnermut naleqqussarsimanerat pissutigalugu timmillaqqippallaanngillat. Taamaammat piaqqat imaanut pigaangata angutivissat nerisassarsiornissaminnut periarfissaqarnerulertarput, aamma piaqqamik nerisassaannik ulluminnut pajuttarunnaarnermikkut nukimmik atuisariaaruttarput.
- Taamaammat piaqqat ullutik qimallugit taamatut imminnut igittarnerat paasinarpoq. Aamma takusinnaavarput appat piaraat toqusartut amerlavallaanngitsut. Angutivissat piaqqaminnik paarsillaqqissupilussuupput, Aarhusip Universitetiani Biosciencemi ilisimatuut pisortaat, Morten Frederiksen, taama oqaluttuarpoq.
Ilisimatuut misissuinerminni angusaat ilisimatuussutsikkut atuagassiami The American Naturalistimi qanittukkut saqqummiunneqarput.
Appat nunarsuaq tamakkerlugu 3-5 millioniupput ikiliartorlutilli. Ikiliartornerannullu pissutaasinnaasut paasisaqarfiginerumallugit Morten Frederiksenip suleqataatalu ilisimatusarnermik suliniut nutaaq aallartissimavaat.