Taaguut ”pisortat pisiarisartagaat” takornartaanngilaq

Nukissiorfiit pisortaat Svend Ove Nielsen aggustimi suliunnaarallarsitaasoq naalakkersuisunit ippassaq soraarsinneqarpoq, suliffeqarfiup akiligaanik namminerminut pisiortortarsimasoq paasineqarmat.

Svend Ove Nielsenilumi akisuunik nuannarisaqarsimavoq, ima akisutigisunik, allaat taaguut: pisortat pisiarisartagaat tusarsaalersimalluni.

Nuummi B&O-nik nioqquteqartarfimmi assersuutigalugu pisortat pisiarisartagaat fjernsyni 49.995 koruuneqarpoq, højtalerilissagaannilu højtaleri ataaseq 16.000 koruunit tungaannut akeqarluni. Fjernsyni taanna piumaneqarluartuuvoq, allaallu ukiup ataatsip ingerlanerinnaani 20-t missaanniittut tunisaareersimapput.

Pisiniarfimmiut oqaaseqarumanngillat, taamaattorli taaguut ”pisortat pisiarisartagaat” aasaq manna tusarsaalersimavoq, pisiniartitsisullu tusaannarlugu suna pineqarnersoq paasereertarpaat takutissinnaasarlugulu.

Pisortat pisiarisartagaannut aamma ilaapput, nipilersuutit musikanlægit, taakku 17.000 koruunit missaannik akeqarput, højtalerit ilanngunnagit.

Svend Ove Nielsenip allaffikuni 287.000 koruunit nalingannut aamma pisatsersorsimavaa.