T-41 uummarisseqqippoq
Angutit illup iluani arsaallutik unammersuarnissaat Aasianni ingerlanneqassaaq T-41 aaqqissuisoralugu aappaagu martsimi sapaatip akunnerata naanerani siullermi.
Klubbi taanna ukiorpassuarni pisoqarfiusarsimaqisoq ukiuni arlalinni unittooqqasutut issimasoq augustimi siulersuisortaarnermikut inuummarisseqqippoq tassalu upernaamut ukiunik 70-nngortorsiorsinnaanngorluni.
Klubbip siuariartornera arsaattartut kattuffiata GBUp kajumissaaserpaalusooq martsip tallimaaniit arfineq aappaat ilanngullugu angutit illup iluani arsaallutik pissartanngorniunnissaannik aaqqissuisuusussanngortikkamiuk.
- Augustimi aallarteqqinnitta kingorna assut tapersersorluarneqarpugut, taama T-41-mi siulittaasoq Charles Mølgaard KNR-imut oqarpoq.
Klubbi maanna assammik arsarnermut isikkamillu arsaannermut immikkoortoqarfeqarpoq.
- Qeqertarsuup tunuani illup iluani arsaalluni pissartanngorniunneq novemberimi aaqqissuupparput tassanilu arnani iligiit tallimat angunilu 13-it peqataapput. Annertuumik aaqqissuussinissamut tamanna ilinniarfiulluarsimavoq nuna tamakkerlugu pissartanngorniuttoqalerpat iligiit 15 16-it peqataasussaammata, taama Charles Mølgaard.
Maanna T-41 GBU suliassanik agguataarisussanngorput unammersuartitsinissamut atatillugu.
- Uagut pingaartipparput annertuallaamik immitsinnut suliakkinnginnissarput, taama Charles Mølgaard oqarpoq.
Arnat illup iluani arsaallutik unammersuarnissaat Nuummi ingerlanneqassaaq martsip 11-ianiit 13-iata tungaanut B-67 aaqqissuisoralugu. Unammersuarnissanut taakkununnga marlunnut nalunaarnissamut killigitinneqartoq tassaavoq januarip 31-iat 2011.