Tûgdlik pillugu suliami ombudsmandi uparuaavoq

(Nutartigaq 15. juli 2011 nal. 11:00)

Inatsisilerituup allagassiaanit atsiorneranillu itigartitsineq allanneqarsimammat. Tamannalu naammaginanngilaq, ombudsmandimit oqaatigineqarpoq. Naalakkersuisoqarfiup piumasaqaat tusarliussatut tiguaa, saniatigullu oqarlutik ajunngitsumik isumaqarlutik suliaq ingerlassimallugu.

- Uagut nammineq isumaqarpugut ajunngitsumik ingerlatsisimalluta, kisiannili inatsisartut ombudsmandiata piumasaqaataa malissavarput, suliarlu ingerlateqqillugu, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimm immikkoortortami pisortaq Kirsten Olesen oqarpoq.

Kisianni maalaarut sumummita tunngava? Inatsisartut ombudsmandeqarfiata inatsisilerinermi pisortaq Michael Mikkelsen aperaarput imalu akivoq:

- Tassa, aalajangiissutitsinni soorlu allakkipput, naalakkersuisoqarfiup aalajangiinini inatsisilerituumut erseqqissartillugu tugdliup inatsisilerituaanut ingerlatitseqqissimamagu. Taamaattumik inatsisilerituumiit aalajangerneqarsimasutut isikkoqalersinneqarluni, Michael Mikkelsen oqarpoq.

Oqartussat suliartik allanut ingerlateqqusaanngilaat nunatsinni ombudsmandi isumaqarpoq.

- Assersuutigalugu inatsisilerituup allagai, uangamik nipeqarlutik allagaagamik. Inatsisilerituup akisussaaffimmik tigusivallaarsimanera ajornartorsiutitut isiginiarsimavarput taamaattumik aalajangiineq atorsinnaanngilaq, Michael Mikkelsen oqarpoq.

Tûgdlik pillugu suliaq nangeqqinneqassanngitsoq kia aalajangeramiuk?

- Soorunami naalakkersuisoqarfiup. Tassami aalajangiivugut, tunngavilersuillutalu, inatsisilerituuttali aalajangiineq aalajangiinerulli tunngavii kisiisa tusarliutissagai peqqunikuarput. Taamaaliorsimavorli Kirsten Olesen oqarpoq.

Inatsisileritooq maanna Italiamiittoq Niels Hansen Damm nammineerluni oqaluttuarpoq, tupaallassimalluni suliaq nutaarsiassani saqqummermat:

- Naalakkersuisoqarfiup attaveqaqatigiinneq isumageqquaa suliaq aallartimmalli suliamut malinnaallunga attuumassuteqalersimagama. Isumaqanngilangali peqqussutinik qaangiisoqartoq. Danmarkimisut ingerlatsineq eqqarsaatigalugu tupaallannarpoq taama ittoqarnera kisiat aalajangiineq tusaatissatut tiguarput, Niels Hansen Damm oqarpoq.

Naalakkersuisoqarfiup inatsit ilisimannginnamikkit?

- Ilumut, ajunngitsumik malissimagaluarpagut, avataaniillu inatsisilerituumik atuisinnaanerput tunngavigiinnarsimavarput. Isumaqarsimagattami folketingep ombudsmandiata oqartussaasut inatsisilerituumik namminersortumik attaveqaqatigiinnermi atuisinnaanerat oqaatigereermagu, nunatsinni taama ittoqarsinnaasorisimavarput, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmi immikkoortortaqarfimmi pisortaq Kirsten Olesen oqarpoq.

Naalakkersuisoqarfiup Tugdlimmut nutaamik allakkiamik nassiussiniarpoq, tassanilu allaqqassaaq naalakkersuisoqarfiup inatsisilerituujunngitsulli aalajangiisimasoq itigartitsinerlu tunngavilersorsimagaa.

Suliap ingerlarna

Suliamut atatillugu aalajangiisoqarsimaneranut Naalakkersuisoqarfiup eqqartuussissuserisuata avammut tusarliussisuunera, Tûgdliup eqqartuussissuserisuata maalaarutigaa:

- Allaanngilaq Naalakkersuisoqarfiup eqqartuussissuserisua aalajangiisuusimasoq, Ombudsmandip eqqartuussissuserisua oqarpoq.

Itigartitsisoqarsimaneranut atatillugu avammut tusarliussinermi Naalakkersuisoqarfiup eqqartuussissuserisuata allakkat qulequtaaniitsinneqarnera maalaarutigineqarpoq, tamannali pillugu maalaaruteqartoqarnera Naalakkersuisoqarfiup tusaatissatut tiguaa.

Naalakkersuisoqarfik Tûgdliup eqqartuussissuserisuanut nutaamik allagaqarniarpoq, Naalakkersuisoqarfiup eqqartuussissuserisuata aalajangiisuusimannginnera matumani erseqqissaassutigineqarniarluni.

Ulloq unnuarlu angerlarsimaffik Tûgdlik Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmit maajip aallaqqaataani matuneqarpoq, Naalakkersuisoqarfimmit paasineqarmat Tûgdliup Namminersorlutik Oqartussanut isumaqatigiissutitik eqquutsissimanngikkai.

Matuneqarnerata kingorna meeqqat Tûgdlimmut inissinneqarsimasut Kommuneqarfik Sermersuumilu sulisut Radioaviisimut oqaluttuarneranni paasineqarpoq nukappiaqqat Tûgdlimmi najugaqartinneqartut persuttarneqartarsimasut, mattunneqartarsimasut sumiginnarneqartarsimasullu.

Suliamut tunngatillugu pisortat 2002-mili paasissutissaataanni tamanna aamma allassimavoq.

Naalakkersuisup Mimi Karlsenip Tûgdliup matuneqarnerata kingorna nassuerutigaa pisortat nakkutiginninnerat pitsaanerusinnaasimasoq, tamannalu aallaavigalugu neriorsuilluni perorsaavinnik nakkutiginninneq ukioq manna juunimiit akulikinnerusumik pisalissasoq, kommunillu Namminersorlutik Oqartussallu suleqatigiinnerat pitsanngorsarneqassasoq.

Tûgdliup matuneqarneranut tunngaviusut, nakuusertoqarsimaneranik sumiginnaasimanermillu unnerluussutit, nukappiaqqallu atugarisassarisimasaat ajortut pillugit ombudsmandi isummersorpa?

- Naamerluinnaq, Michael Mikkelsen Ombudsmandeqarfimmi inatsisilerinermi pisortaq oqarpoq, nangillunilu:

- Eqqartuussissuserisup suleriaasia kisiat sammisimavarput, allamik naamik, Michael Mikkelsen oqarpoq.

Eqqartuussissuserisup suleriaasiata saniatigut allanik Ombudsmandi sammisaqanngilaq, eqqartuussissuserisup suleriaasia kisiat sammisimavaa.

- Taamannalu pillugu isumaqarpunga Tûgdliup matuneqarnera Ombudsmandip Atuagagdliutini isummerfigisimagaatut nipeqarnera ajortoq, Ombudsmandimi taamaaliunngilaq. Kirsten Olesen, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmi immikkoortortaqarfimmi pisortaq oqarpoq.