Søvndal: Danmarkip tusaamaneqarnera kalaallit innarlerpaat
Nunatta arfattassanik 211-niik 221-nut amerliliiniarnera siorna IWCip itigartippaa. Arfattassat amerlinissaannik piumasaqarneq ilisimatuussutsikkut inassutit IWCip tusaaniartagai tunngavigalugit pigaluarpoq. Taamaattoq politikkerit ilisimatuunit ilisimasaqarnerusuusillutik allatut aalajangerput arferit pisarinagit takornarianut isiginnaartinnissaat Europamiut piumanerummassuk.
Nunatsinni pissutsinik paatsuisut isummersornerat maanna nunanut allanut ministerip Villy Søvndalip ilalersorpaa. Siornatigulli nunanut allanut ministeri Per Stig Møller isumaqataanngilaq.
- Kalaallit kulturiannut ilaalluinnarpoq pisuussutinik atuinissaq kalaallillu piumasaat ilisimatuussutsikkut ilisimasanik tunngaveqarput. Tamanna IWCp akuerisariaqaraluarpaa taamatummi ingerlasoqaannassappat kattuffissuarmut ilaasortaajunnaartut arlaqarsinnaapput. Nungusaataanngitsumik piniarnissaq IWCp akuersaarsinnaanngikkuniuk kattuffiup ataannarnissani annaassavaa tamatumalu kingorna arferit aqunneqanngitsumik nungusarneqarnerat kingunerisinnaallugu, siornatigut Konservatit sinnerlugit nunanut allanut ministeri Per Stig Møller Kristelig Dagbladimit issuarneqarpoq.
Kalaallit iliuusaat Danmarkimi naalakkersuisunik tapersersuisut Enhedslistenimeersut aamma taperserpaat. Taakkumi aamma isumaqarput ilisimatuussutsikkut illersorneqarsinnaasumik amerlassusilikkanik arfanniartoqarsinnaasariaqartoq.
- Kalaallit Nunaata Danmarkimilu naalakkersuisut isumaqatigiinnginnerat takusinnaanngilara tassami kalaallit kissaataat Søvndalip ilalerpaa maanna IWC tamatuminnga malinnilersaanngimmat. Aaqqiinissaq siunertaralugu kattuffissuaq oqaloqatigineqartariaqarpoq. Arfanniarneq misigissutsinut tunngasorujussuuvoq taamaattoq nunap inoqqaavisa immikkut malittarisassiunnissaat anguneqarsimalluni. Imaani pisuussutit isumalluutigisussaavaat nunami allanik nassaarnissap tungaanut, Enhedslistenip nunarput pillugu oqaaseqartartua Finn Sørensen oqarpoq.
Inuit Ataqatigiinnit Folketingimi ilaasortap Sara Olsvigip Villy Søvndalip isummersornera paasiuminaatsippaa ilimaginnginnamiuk Danmarkimut akeqqersortoqalernissaa.
- Kalaallit Nunaat salliutittariaqarpaa tassami IWC-mi Danmark nunarput sinnerlugu oqaaseqartarmat naatsorsuutigaara aamma maanna taamaasiussasoq. Danmark ilaasortaanissamut tunngavissaqanngikkaluarpoq Savalimmiut nunarpullu naalagaaffeqatiginngitsuugunigit, Sara Olsvig oqarpoq.
Ilanngullugu eqqaasitsissutigaa IWC-mut ilaasortaaginnarnissaq nalilersorneqartuartoq nalornissutigisarnerarpaalu arfanniarnermik illersuisut akerlilersuisullu isummersorfiginissaat. Tassami nunatta imminut pisassinnera qisuariarfigineqarsinnaammat.
