Søren Pind: Kalaallit parnaarussat Danmarkimiiginnarsinnaassapput
Danskit inatsisinik atuutsitsinermut ministeriat Søren Pind (V) taama oqarpoq. Taanna inatsisissatut siunnersuummik saqqummiussiniarpoq, kalaallit Herstedvesterimi inissinneqartussatut pineqaatissinneqarsimasut Danmarkimiiginnarusunnerlutik imaluunniit Nunatsinnut uterusunnerlutik nammineerlutik aalajangiinissaannut periarfissinniarlugit.
- Pinerluuteqarsimasunut inissiisarfittaassamut atatillugu isornartorsiuinerit maannamut tusarsimasagut akueraagut, pineqaatissinneqarsimasullu naleqquttumik inissinneqarnissaat inatsisissatut siunnersuuteqarnitsigut aqqutissiuutissavarput, danskit inatsisinik atuutitsinermut ministeriat Søren Pind (V) nittartakkamut Altingetimut taama allappoq.
Aamma atuaruk Inissiisarfittaassap inissaaleqiffiunissaa aarleqqutigineqartoq
Nutaarsiassarlu taanna Nunatsinni Pinerluttunik isumaginnittoqarfimmi pisortap tunualersup Hans Jørgen Engbop nuannaarutigaa.
- Inuit pinngitsaalillugit Herstedvesteriliartissinnarlugit, ukiullu arlallit tassaniitissinnarlugit kissaatiginngisaannik allamut pinngitsaalillugit nuutsinneqarnissaat pissusissamisuunngilluinnarpoq, Hans Jørgen Engbo Altingetimut oqarpoq.
Qassillu Nunatsinnut uterusunnersut Hans Jørgen Engbop oqaatigiuminaatsippaa.
Aamma atuaruk Parnaarussat Herstedvesteri Nuummit piumanerugaat
- Suli aperineqanngillat. Arlallilli Danmarkimiiginnarusullutik oqaatigisimagaat tusarpara. Affaasa Nunatsinnukarnissaat, affaasalu Danmarkimiiginnarnissaat ilimagaarput. Sunik atugassaqartinneqassanersut apeqqutaassaaq, Altingetimut taama oqarpoq.
Atugassarititaasut pineqartut ilaatigut tassaapput Nuummi pinerluuteqarsimasunut inissiisarfittaassami sunik sammisassaqartitsisoqassanersoq aamma sutigut tapersersuinermik neqerooruteqartoqassanersoq. Aamma pulaartoqarnissamut immikkut ittumik aaqqissuussisoqassanersoq apeqqutaassaaq, qanigisaasut pineqaatissinneqarsimasullu anigallarnissamut akuersissuteqartut tikeraarnerminnut atatillugu angalanerminnut akiliunneqartarlutik.
Inatsisissatut siunnersuutissaq Kalaallit Nunaanni pinerluttulerinermi inatsisip allanngortinnissaanik imaqassaaq, tamannalu Inatsisartunit akuerineqaqqaartussaassalluni.
Tamanna pereerpat aatsaat Folketingimi suliarineqarsinnaavoq.
