Søren Gade: Sivisoorsuarmik aattaqaqisumillu sorsuttoqassaaq
Danmarkimi Illersornissamut ministeri, Søren Gade, miserratiginagu ullumi oqarpoq, danskit sakkutuuisa Afghanistanimi sivisuumik aattaqaqisumillu sorsuunnissartik ilimagisariaqaraat.
decembarip 19-at 2007 17:26
-Uanga paasinnittaasera malillugu ukiut qulit 15-illuunniit qaangiuppata Afghanistanimi aatsaat ernumanartoqarunnaassaaq, Søren Gade oqarpoq. Peqqarniisaartartut Talebanikkut 2008-p aallartilaarnerani saassussinissaat Gade-p aamma ilimagaa.
-Talebanikkut annikilliortitaapput, taamaammat qaartartunik amerlanernik, aamma qaartartunik aqquserngit sinaannut inissitanik amerlanernik, qaammatini tulliuttuni atuinissaat ilimanarpoq, taavalu imminuujutigalutik qaartartumeerisut amerleriassagunavillutik. Danskit sakkutuuisa isumannaatsuunissaannut tamanna akornutaassaqaaq, afghanistanimiulli inuinnaat aamma ulorianartorsiortinneqassaqaat, Danmarkimi Illersornissamut ministeri naliliivoq.
