"Søren Espersen qaammaasaqanngitsutut oqaluppoq", Kuupik Kleist oqarpoq.
Dansk Folkepartiimeersup Søren Espersenip Kalaallit Nunaat ukiut 50-t iluanni namminiilivissinnaannginnerarlugu oqarnera, Folketing-imi ilaasortap Kuupik Kleistip qaammaasaqannginnertut nalilerpaa.
- Dansk Folkeparti nunatta namminersulerniarnermini peqataanermini manna tikillugu toqqammaviusumut isumaqataasimagaluarpoq uanga ataatsimeeqataasarnikka naapertorlugit. Tassalu nunatta namminersulerniarnera annertunerpaamik nunatsinni innuttaasunik aalajangerneqassasoq qanoq ililluni qaqugulu pissanersoq isumaqataaffigalugu. Taanna isumaqatigiunnaarsimagunikku soorunalimi isumaqatigiunnaarsimassavaat, kisianni nunatta Danmarkillu suleqatigiinneranni taamatut allarluinnarmik tunngaveqarluni isummersulerneq isumaqarpunga uparuartariaqartoq, aamma maluginiartariaqartoq, pissutigalugu massakkut Danmarkimi naalakkersuisuusut Statsministerilu Anders Fogh-i iliuuseqarneq ajormata Dansk Folkepartip isumaqatiginngisaanik, taama Kuupik Kleist oqarpoq.
Kuupik Kleist nutaarsiassaqartitsivimmi ritzau-imi issuarneqarpoq, Søren Espersenip taama oqarnera ilungersuutiginianngikkini. Kuupik Kleist aperaarput, qanoq ililluni tamanna isiginngitsuusaaginnarsinnaaneraa, Danmarkimi naalakkersuisunit Dansk folkeparti taama pinngitsoorneqarsinnaanngitsigitillugu.
- Taamatut oqarninni pissutigaara isumaqarama ingattarsernerusoq, aammalu ukiariaq Dansk Folkepartiiminngaanniit nunatsinnut tunngasunik isummersoqattaarneq ilaatigut nunatsinni illoqarfiit nunaqarfiillu atiisa kalaallisut atorunnaarnissaat danskisullu taagorneqaqqilernissaannik tunngasunik oqaaseqarneq isumaqarpunga takutitsisoq imatut ilumooruterujussuarlugit pineqarsinnaanngitsutut. Illuatungaatigut maluginiarneqartariaqarsoraara Danmarkimi naalakkersuisunut tapersersuisuusut taakkununngalu atatitsisuusut taamatut isummersormata. Naatsumik oqaatigalugu, qaammaasakinnermik pivoq, immaqalu Søren Esperseni aasaq manna nunatsinniinnermini qanoq misigisaqarsimanerami taamatut akeqqersimaartumik nipilimmik tutsiuttaqattaarpoq, Kuupik Kleist oqarpoq.
Taanna qalleqqissarlugu apereqqipparput, tamanna ilungersuutiginiarnagu oqarnini qanoq isumaqarfigineraa.
- Naalakkersuinikkut isumatoorujussuartut imaluunniit itisoorujussuarmik isummerfissatut isiginngilara sianiilliornertut isigigakku, Kuupik Kleist oqarpoq.
Taanna aamma oqarpoq, qanorluunniit Dansk Folkeparti oqaraluarpat suliatik ingerlaannarumaartut.
Taamatuttaaq erseqqissaatigaa, namminiilivinnissamut ataatsimiititaliap nalunaarusiarititaa maannamit ukiup ataatsip tungaanut naammassineqarumaartoq.
Venstre-miit Kalaallit Nunaat pillugu oqaaseqartartup Lars Christian Lilleholtip Kuupik Kleist isumaqatigaa.
- Naalakkersuisuniit isumaavoq, Kalaallit Nunaata qaqugu namminiilivikkumaarnissi nammineq aalajangissagaa, tamannalu allanngortinneqarsinnaangnilaq, taama Lars Christian Lilleholt oqarpoq.
