Søren Espersen: Danmark utoqqatsertariaqanngilaq
- Oqaluttuarisaanermik ilisimasalik, imaluunnit ilisimasallit tamanna qulaajaavigisuugunikku, tusagassiortulluunniimmi tamanna qulaajaavigisuuppassuk iluassagaluarpoq. Inuimmi matumani pineqartut amerlanersaat suli uumapput, naalagaaffiulli misissuinissaanik piumasaqaat peqataaffigerusunngilarput, Søren Espersen Radioaviisimut oqarpoq.
Misissuinissamulli naalagaaffimmiiit aningaasaliisoqassanersoq aperigatsinni Søren Espersen isumaqataavoq, oqaluttuarisaanermik ilisimasalik tamanna pillugu misissuiniarpat arlaatigut aningaasaliiffigineqarsinnaanissaa ammaffigalugu.
Meeqqalli Danmarkimut 1951-imi nuutsitaasut naalagaaffimmiit utoqqatserfigineqassanersut aperigatsigu ima akivoq:
- Qangarsuarli pisimasut kinguaariillu arlallit matuma siornatigut piliaat pillugit utoqqatsertoqarnissaa peqataaffigerusunngilara, asuli pinerussaaq. Kinguaariit ukiorpassuit matuma siornatigut inooriaasaat allaanerupput, ullutsinnullu sanilliunneqarsinnaanatik. Taamaammat utoqqatsertoqartariaqanngilaq. Periaaseq taanna ullutsinni atugaavallaaqaaq. Tamanna ajuusaarnaqaaq, Søren Espersen oqarpoq, nangillunilu:
- Taamanikkut inuusut taamaaliornermikkut siunertaat ajorsimanngitsut qularutiginngilara. Eqqaamassavarpummi politikerit Danmarkimeersut Kalaallillu Nunaanneersut matumani aalajangiisuummata, Søren Espersen oqarpoq. Danmarkip ministeriunerata Lars Løkke Rasmussenip tamanna pillugu iliuusissani nammineq akisussaaffigiumaarai, Søren Espersenip erseqqissaatigaa, utoqqatsernissamillu piumasaqaat kingumut asuleerusoralugu.
